SJOKOLADEKOLWYNTJIES MET KARAMELVULSEL

Lewer 24

BESTANDDELE

Kolwyntjies ½ koppie sagte botter ¾ koppie suiker 2 eiers 1 teelepel vanilla essence ’n Knippie sout 2 koppie koekmeel 3 eetlepels kakao 2 teelepels bakpoeier 1 koppie melk 1 koppie caramel treat Botterversiersel 250 g botter teen kamertemperatuur 500 g versiersuiker (icing sugar), gesif 5 ml vanilla essence 30 ml melk

METODE

Kolwyntjies: Voer 2 x 12 gat muffinpanne met kolwyntjiehouers. Klop die botter en suiker saam tot lig. Klits die eiers een vir een by en meng. Voeg die vanilla essence en sout daar- na by. In ’n aparte bak, sif die koekmeel, kakao en bakpoeier saam. Roer die meelmengsel en melk om die beurt by die eiermengsel. Verdeel die beslag tussen die kolwyntjiehouers. Bak in ’n voorverhitte oond by 180°C vir 15 minute. Haal dit uit die oond en laat heeltemal afkoel op ’n draadrakkie. As dit heeltemal afgekoel het, gebruik die steel van ’n houtlepel en druk ’n holte in elke kolwyntjie. Vul ’n spuitsakkie met die caramel treat en vul die holte van elke kolwyntjie daarmee. Versier met botterversiersel en met enigiets anders soos jy wil.

Botterversiersel: Room die botter tot glad met ’n klitser. Voeg die gesifte versiersuiker bietjie vir bietjie by, gevolg deur die vanilla essence. Meng die melk by om dit gladder te kry. Plaas die versiersel in ’n spuitsak en versier die kolwyntjies byvoorbeeld met kersies.