Lekker kos: Van Paasfees tot partytjies! 22

Paasfees is ’n tyd vir familie en lekker eet. Met dié lekker koek en kos kan jy sommer heeljaar feesvier.

SJOKOLADEKOEK Lewer 1 koek BESTANDDELE Koek

¾ koppie sterk koffie, effens afgekoel ¾ koppie sonneblomolie 4 eiers 1 ¼ koppie suiker 1 teelepel vanilla essence 2 koppies bruismeel (self-raising flour) 3 eetlepels gewone kakaopoeier 2 eetlepels donkerkakaopoeier

Sjokolade-botterversiersel

250 g margarien teen kamertemperatuur 500 g versiersuiker (icing sugar), gesif 2 eetlepels donkerkakao 2 eetlepels gewone kakaopoeier Genoeg choc chips

METODE

Koek: Meng die koffie en olie en laat effens afkoel. Klop die eiers, suiker en vanilla essence saam tot lig en donsig. Sif die meel en kakao saam. Voeg die meelmengsel en koffie-en-oliemengsel by die eiers en vou liggies deur. Verdeel die mengsel in twee gesmeerde koekpanne met ’n deursnee van 16 cm elk. Bak by 180 °C tot gaar en ’n toetspen skoon uitkom. Haal uit die oond en laat heeltemal afkoel op ’n draadraak. Maak intussen die botterversiersel.

Sjokolade-botterversiersel:

Klop die margarien en 100 g van die versiersuiker liggies. Sif die res van die versiersuiker en die kakao saam. Voeg die suikermengsel een koppie op ’n slag by die bottermengsel en klop goed. Skep ¹/3 van die versiersel in ’n spuitsak. Sny die koeke se bokante gelyk en sny elke koek in twee lae. Stapel die lae opmekaar met die res van die versiersel tussen elke laag. Versier met versiersel in die spuitsak en Paaseiers. Plak choc chips op die onderste deel van die koek.