MAAK KLERESKULD DEEL VAN JOU VERLEDE

As jy reeds in die strik getrap het van klere op rekening koop en maandeliks met hoë bedrae sit wat jy daarop moet afbetaal, kan dit 'n goeie idee wees om eers hierdie skuld af te betaal voor jy 'n huis- of motorlening aanpak.

Francis Albertus (41)* van die Paarl het op 'n stadium ses winkelkaarte en twee kredietkaarte gehad waarmee sy geshop het. Totdat sy op 'n dag besef het sy betaal af aan goed waarvan sy nie eens meer hou nie.

“Ek het net daar besluit om my winkelkaarte af te betaal en te sluit,” vertel sy.“Ek het die kaart waarop ek die minste geskuld het, eerste klaarbetaal. En daardie gevoel om een kaart minder te hê om te betaal, was fantasties. Dit het later amper lekkerder geword om af te betaal en te sluit, as om te shop!

“Vandag het ek geen winkelkaarte nie en slegs een kredietkaart wat ek amper nooit gebruik nie. Ek betaal kontant of lay-bye deesdae eerder.”

Hier is haar wenke:

Maak 'n lysie van hoeveel winkelkaarte jy het en tel op hoeveel jy altesaam nog op almal skuld.

Identifiseer die winkelkaart waarop jy die minste skuld het en begin R200 per maand meer daarop betaal. Sodra daardie een klaar is, sluit die rekening. Begin dan R200 meer op die volgende een betaal.

Gaan voort hiermee totdat jy alle winkelkaarte afbetaal het. Daarna kan jy die ekstra R200 op elkeen saamvoeg en met daardie bedrag die volgende lening aanpak.

“Dit klink dalk min en na 'n lang proses, maar die bevrediging van sien hoe jou skuld ál minder raak, maak dit die moeite en tyd werd,”sê Francis.

*Skuilnaam