VOORVALLE NEEM TOE

Die area naby waar Danneline aangeval is, 35th Avenue en Bishop Lavis Drive, is‘n smash-en-gryp-vrotkol in die Kaapse metro, lui‘n Stad Kaapstad-verklaring.

Tussen Maart 2022 en Augustus vanjaar was daar ses sulke voorvalle, en 85 van diefstal uit‘n motor hier, sê JP Smith, die Stad se burgemeesterskomiteelid vir veiligheid en sekuriteit.

“Motoriste is op hul kwesbaarste wanneer hulle stilstaan by ’n kruising, en hul aandag is dikwels afgetrek deur hul sefone of ander items.

“Dié misdade het die afgelope paar maande toegeneem en soos ons nader aan die feestyd beweeg, gaan dit waarskynlik verder toeneem.

“Ek wil‘n beroep doen op motoriste om bewus te wees van hul omgewing; hierdie is opportunistiese misdade, so maak seker jou waardevolle besittings is buite sig [in die kar se boot] en dat al jou deure gesluit is,” sê hy.

“Smash-and-grabs word gewoonlik deur bendes of ’n sindikaat gepleeg, en al vang ons hulle, ontsnap hulle geregtigheid omdat daar ’n tekort aan 10 000 speurders landwyd is. Dít beteken dat sake teruggetrek word omdat daar geen sinvolle ondersoek daarna is nie. En dít is ’n mislukking deur die strafregstelsel op nasionale vlak.

“Daar moet een beampte vir elke 300 mense te wees. Ons het tans skaars een beampte vir elke 590 mense,”sê hy.

“Ons het ’n saak gehad waar‘n wetstoepasser ’n smash-and-grab in September 2022 sien gebeur het, die ou agtervolg en hom gevang het. Die gesteelde items is verkoop aan ’n dwelmhandelaar vir tik. Daar was dus ’n arrestasie en genoeg inligting vir vervolging. Maar die beampte het onlangs ’n teksboodskap ontvang dat die saak teruggetrek word,”sê JP.

“Dus, selfs wanneer ons hierdie ouens aankeer, faal die kriminele regstelsel die mense en die misdadigers systap geregtigheid.”