JOU GESONDHEID
Leefstylsiektes wat spruit uit oorgewig wees, ongesonde eetgewoontes en onaktiwiteit, is deesdae gewoon.
Jy kan vandag al begin om beheer van jou gesondheid te neem.
Dr. Leila Sadien, ’n mediese dokter en intuïtiewe geneser, sien gewigsverlies as meer as diëte, aanvullings of oefening, maar eerder as ’n holistiese leefstylplan.
“Kliënte kom baie na my toe en sê hulle het alles probeer, maar niks werk nie, dan sien hulle hulself as ’n mislukking,” verduidelik Leila.
Sy sê wat hulle dikwels nie aanspreek nie, is die traumas wat gelei het tot skadelike gedrag soos om hulle te vergryp aan kos of verslawing. Hier is haar raad:
• Luister na jou liggaam Veltoestande soos aknee en ekseem, IBS (prikkelbare dermsindroom), waterretensie en gewigstoename is maniere waarop jou liggaam kommunikeer dat die balans nie reg is nie, en jy van gifstowwe ontslae moet raak. As jy gewig optel en nie die rede deur konvensionele mediese toetse kan vasstel nie, is daar ’n onderliggende disfunksie. Vroeë skildkliersiekte, insulienweerstandigheid en IBS is byvoorbeeld oorsake wat gemis kan word.
• Koester jouself
As jy vir jare yo-yo-diëte gevolg het, is dit maklik om te glo jou liggaam het jou verraai. Dit het ’n impak op hoe ons voel en ons onsself sien, en dit kan lei tot selfsabotasie. Werk daaraan om te luister na jou behoeftes en begin om jouself te vertrou as versorger.
• Bou beter grense
Laat gaan toxic verhoudings wat geen doel dien nie. Dikwels is oortollige gewig gekoppel aan sulke verhoudings met die mense om jou. Daarom beveel sy ’n detox aan wat ontslae raak van negatiwiteit.
“Dis belangrik om openlik en eerlik met jouself te wees oor waar die negatiwiteit vandaankom, en hoe jy dit gaan hanteer. Eers wanneer ons dít gedoen het, kan ons ons laste ligter maak en verdraagsaam wees met onsself.”