BETAAL JOU BELASTINGSKULD SÓ
Skuld jy vir Sars geld maar kan nie dadelik opdok nie? Hier is wat jy kan doen.
1 Maak eers seker dis nie ’n skelmstreek nie
As jy ’n aanmaning kry, vra die belastingkantoor eers direk vir ’n balansstaat. Stuur ’n gratis SMS na 47277. Hou jou belastingverwysings en ID-nommer byderhand. Die belastingkantoor sal dan bevestig of jou naam aan ’n skuldinvorderaar oorhandig is. Dié invorderaars is ook by sars.gov.za gelys.
2 Tref reëlings om dit af te betaal
Bel Sars by 0800-007-277 of e-pos hulle by sarsdebtmanagement2@sars.gov.za. Jy kan ook jou versoek op eFiling indien.
As ’n aangewese skuldinvorderaar jou gekontak het, kan jy deur hulle die versoek indien. Jy moet verduidelik hoekom jy uitstel benodig. Verskaf inligting soos die laaste ses maande se bankstate, onlangse betaalstrokies en bewyse van uitstaande rekeninge.
As Jan Taks dit goedkeur, sal hulle betalingsreëlings voorstel. Dit sluit in die verwagte betalingstermyn, jou rekeningsaldo, die betalingsplan se begin- en einddatum, die paaiementbedrag, rente en boetes.
Jy kan vra dat hulle die betaaltermyn of maandelikse paaiementbedrag aanpas.
Jy sal opsies vir die maandelikse betalings kry, byvoorbeeld ’n elektroniese oordrag, debietorder of salarisaftrekking.
3 Moontlike klippe op jou pad
Die belastingkantoor sal net jou afbetalingsversoek oorweeg as al jou opgawes ingedien en bygewerk is. Jy sal hulle moet oortuig dat jou finansiële situasie gaan verbeter en dat jy sekuriteit vir jou skuld sal kan gee of dit kan afbetaal.
As jy al voorheen ’n afbetalingsooreenkoms gekry het en dit nie nagekom het nie, sal jy moet verduidelik hoekom nie.
As jy nie die betalingsooreenkoms nakom nie, sal dit tot niet verklaar word en dan sal Jan Taks stappe teen jou neem.
Hoe gouer jy jou aansoek vir ’n afbetalingsreëling indien, hoe beter, anders gaan jy meer rente betaal.
4 Kan jy die skuld betwis?
Ja. Jy kan ’n dispuut by Sars indien. Gebruik eFiling om dit te doen, of kontak die klagtekantoor, kontaksentrum of enige van sy takke. Hulle het 21 werkdae om jou saak op te los. As jy daarna ontevrede is, kan jy die belastingombud nader. Jy kan aansoek doen dat die skuld tydens die hantering van die dispuut opgeskort word. As dit toegestaan word, mag die belastingkantoor geen invorderingstappe neem tot die dispuut afgehandel is nie.
5 Wat gebeur as jy nie jou belasting betaal nie?
Dis ’n kriminele oortreding om nie ’n belastingopgawe betyds in te dien of te betaal nie. Jan Taks kan jou skuld by jou werkgewer invorder, jou besittings afvat en verkoop vir die geld, of jy kan tronkstraf kry. Betaal dus maar liewer!