PASOP VIR DIÉ SLAGGATE
JY BENADER DIE ONDERWYSER SONDER RESPEK
Onthou dat die onderwys ’n professionele beroep is, sê Inge.“As jy bekommernisse het, bespreek dit met hulle en vra hul professionele mening. Sê byvoorbeeld:‘Ek wil graag weet hoe jy dié toets of projek geassesseer het’eerder as:‘Ek dink jy was onregverdig.’”Erken dat die onderwyser die kenner op dié gebied is, en benader enige gesprek só.
JY KRY INLIGTING NAMENS JOU KIND
Wees versigtig dat jy nie die onderwyser kontak vir huiswerk of inligting wat wel in die klas gegee is, maar waarna jou kind nie opgelet het nie, sê Annemarie. “Leerders moet ook luister na aankondigings en opdragte, want dit is net té maklik as Ma ’n oproep moet maak.” Inge beaam dit.“As jou kind nie geluister het in die klas nie en nie weet watter huiswerk om te doen nie, moet hulle die gevolge dra.”
JY RAAK TE EMOSIONEEL
“Ons kinders is natuurlik vir ons ’n emosionele saak,”sê Inge,“maar probeer om nie jou emosie by die gesprek te betrek nie. Wees professioneel en hou die gesprek informatief.”Só kan jy ’n konstruktiewe gesprek hê en nie net ’n afpaksessie nie – iets waarby jou kind nie eintlik gaan baatvind nie.
JY IS TE KNAEND
Hou maar by die onnie of skool se kommunikasieraamwerk, en gee genoeg tyd vir die onderwyser om te antwoord. “Hou ook altyd by werkure, veral as jy bel of ’n WhatsApp stuur,”sê Inge. Dink ook mooi of daar nie ’n maatjie se ouer is wat jou vraag sal kan beantwoord nie.
JY IS ONGEDULDIG
Ouers moet besef onderwysers se roosters is bitter vol, sê Annari.“Ons gee dalk skool net tot eenuur of tweeuur, maar daarna het ons dikwels sportafrigting en ander verpligtings. Dan moet ons voorberei vir die volgende dag en merkwerk inhaal. Verstaan asseblief as ons nie dadelik ’n boodskap terugstuur nie en respekteer die feit dat ons ook ons eie kinders en gesin het.”