REGTE VAN PAARTJIES WAT SAAMBLY
Ál meer paartjies verkies om nie te trou nie. Maar watter finansiële sekuriteit en regte is daar in ’n saamblyverhouding?
WAT IS MY REGSTATUS?
Die Suid-Afrikaanse reg verleen nie gemeenregtelike huwelikstatus aan saamblypaartjies nie.
Die mense in sulke verhoudings word ongelukkig nie as mekaar se wettige gade beskou nie, maak nie saak hoe lank hulle al saam is of om watter rede hulle nie trou nie. Hulle kan daarom nie staatmaak op die regte van konvensionele egpare nie.
Tog is daar stappe wat hulle kan doen om hul finansiële sekuriteit te verseker.
Skriftelike ooreenkomste
Die paartjie kan ’n skriftelike ooreenkoms tussen hulle opstel waarin hulle uitstippel wat elkeen se regte en verpligtinge in hul saamblyverhouding is.
So ’n ooreenkoms werk soos ’n kontrak tussen vennote en is wetlik afdwingbaar solank albei vennote leef, en ook teen elk se testament as een sterf.
Maar hulle sal steeds mekaar by naam en baie spesifiek as erfgename in hul testamente moet benoem.
‘n Prokureur kan jou help om so‘n kontrak op te stel om seker te maak dit voldoen aan alle regsvereistes.
Geregistreerde saamblyverhoudings Saamwoonverhoudings kan geregistreer word ingevolge die Wet op Burgerlike Vennootskappe. Die geregistreerde verhouding is dan amptelik ’n burgerlike vennootskap.
Elke paartjie se regte sal afhang van hul huweliksbedeling. Hulle kan kies tussen ’n huweliksvoorwaardekontrak buite gemeenskap (met óf sonder die aanwasbedeling) en een binne gemeenskap van goedere. Die doel van die voorhuwelikse kontrak is onder meer om elkeen finansieel te beskerm.
REGISTRASIE-VEREISTES
Om ’n burgerlike vennootskap tussen ’n paartjie te registreer, moet elke vennoot 18 jaar of ouer wees en geldige Suid-Afrikaanse identiteitsdokumente hê. As een ’n buitelander is, is ’n geldige paspoort nodig. En as een van die twee byvoorbeeld voorheen getroud was, word ’n egskeidingsbevel of ’n sterftesertifikaat van die oorlede gade benodig. Maak seker julle weet wat al die regsvereistes is, en kom elkeen getrou na.
VYF VRAE OOR BURGERLIKE VENNOOTSKAPPE
1 Wat behels ’n huweliksvoorwaardekontrak binne gemeenskap van goedere?
Die paartjie deel alle bates en is geregtig op die helfte van mekaar se bates.
2 Is ek verantwoordelik vir sy of haar skuld?
As die burgerlike vennootskap binne gemeenskap van goedere is, is julle saam verantwoordelik vir die skuld wat enigeen van julle maak. Jy is altyd verantwoordelik vir skuld waarvoor jy borg staan.
3 Wat behels buite gemeenskap sonder die aanwasbedeling? Sonder die aanwasbedeling beteken dat elkeen se bates hul eie bly – dít wat julle in die burgerlike vennootskap inbring, en ook dít wat daarna versamel word.
4 En mét die aanwasbedeling? Albei behou die bates wat julle voor die registrasie gehad het, maar die groei van die onderskeie boedels word verdeel as die burgerlike vennootskap deur die dood of egskeiding beëindig word.
5 Hoe word ’n geregistreerde burgerlike vennootskap beëindig? Julle moet ’n hofaansoek indien om dit te ontbind. Dit word nes ’n egskeiding hanteer.