Vra vir Afrikanerbees-veldvleis
Vleis moet smaaklik, sag en sappig wees. Afrikanerbees-veldvleis kry ’n regmerkie in elke boksie, én dis goed vir jou gesondheid!
Die Afrikaner is ’n inheemse beesras wat Jan van Riebeeck al in 1652 aan die suidpunt van Afrika aangetref het. Die ras is perfek by Suid-Afrika se omgewing en natuur aangepas. Nou, in 2015, is hierdie proteïenbron optimaal ontwikkel vir gehaltevoeding vir die mens – in ’n era waarin daar baie vrae is oor die gehalte en naspeurbaarheid van voedsel.
Die proteïensamestelling van Afrikanerbeeste se vleis kan meeding met dié van die beste rooivleis op die planeet. Proteïene wat in groot maat geproduseer word (voerkraalbeeste wat gevoer word op graan en kragvoer), het min ander voordele, behalwe dat dit ’n proteïenbron is. Die oplossing? Terug na veldvleis, waar diere gras en blare in die veld vreet en dit gebruik as voedingsbron vir vleisproduksie.
Afrikaner-veldbeeste word afgerond op 18 maande tot 2 jaar oud. Die karkasse is dan bedek met ’n laag geel vet. Hierdie geel vet het ’n legio voordele vir die mens. Dit sorg vir sappigheid en smaaklikheid in die vleis, maar is ook hoog in karoteen en laag in skadelike LDL-cholesterol. Dit bevat ’n hoë konsentrasie omega 3- en omega 6-vetsure (broodnodig vir menslike ontwikkeling) en is ook ryk aan lanolien.
Wat beteken dit vir die huisvrou, besorgde ma van kinders, hotelle en restaurante? As u veldvleis van Afrikanerbeeste bedien, sorg u dat uself en u gaste gesonde proteïenvoeding kry wat sag, smaaklik en sappig is.
Die geel vet van die vleis is absoluut nodig in ons dieet om ons te voorsien van die essensiële vetsure, soos aanbeveel deur professor Tim Noakes.
Die gereelde gebruik van Afrikanerbees-veldvleis op jou tafel verlaag die risiko van kanker, hartvatsiektes en beroerte. Kinders wat veldvleis eet, toon verminderde las van ADHD en hul oogontwikkeling is optimaal. Daarmee saam kry u en u gaste geen antibiotika, groeistimulante en skadelike bakterieë in nie. En as bonus eet jy smullekker aan gesonde beesvleis!
Afrikanerbees-veldvleis, dis mos boerekos!