SKAAPSKENKELKERRIE

Daar moet net ’n effense byt in die lug wees, dan is dit vir my genoeg rede om hierdie kerrie te maak. En skenkels is weer my eerste keuse hiervoor. Die murg in die bene word deurtrek met die geurige kerriesous. Jy moet net sorg dat jy saam met mense eet wat nie skaam is om bene af te eet en murg uit te suig nie. (As jy nie van sterk kerrie hou nie, laat die brandrissie uit en verminder die kerriepoeier tot 5 ml.)

4 groot skaapskenkels, in 2 cm-skywe gesaag 60 ml olie 1 ui, gekap 3 knoffelhuisies, fyn gekap 10 ml fyngerasperde, vars gemmer 5 ml gemaalde koljander 5 ml fyn komyn 10 ml sterk kerriepoeier 1 groot kaneelstok 2 steranyssade 1 rooi of groen brandrissie, met pitjies en al fyn gekap 1 x 410 g-blik gekapte tamaties Water (of flou vleisaftreksel) Sout, vars gemaalde swartpeper en bruinsuiker na smaak Vars koljander of pietersielie

Verhit die olie in ’n swaarboompot en braai die skenkels bruin. Skep uit en hou eenkant. Braai die ui in dieselfde pot tot sag. Voeg die knoffel, gemmer, koljander, komyn, kerriepoeier, kaneelstok, steranys en brandrissie by en braai vir ’ n paar minute tot geurig. Voeg die tamaties by. Maak die tamatieblik twee keer vol water (of flou vleisaftreksel) en voeg dit ook by. Verhit tot kookpunt en laat prut vir 5 minute. Geur die sous met sout, peper en ’n knippie bruinsuiker na smaak. Sit die skenkels terug in die pot, bedek en prut lank en stadig (ongeveer 3 uur) tot die vleis baie sag is. (As dit lyk of die sous te min word, voeg ekstra water by.) Roer nou en dan. Rond af met ’n skeut vars suurlemoensap en sprinkel gekapte, vars koljanderblare of pietersielie oor. Sit voor op gestoomde witrys. Lewer 4-6 porsies.