ROB SYMONS
Rob Symons se Zoeloe-bynaam is MuthiMuthi, wat “hoë boom” beteken. Hy verbou organiese kruie en groente op sy plaas, Broadleaze (170 ha), in die Mkondenivallei naby Pietermaritzburg. Hy kan nie voorbly om in die vraag daarna te voorsien nie.
JOU PASSIE IS ORGANIESE BOERDERY. WAT IS DIE VOORDELE DAARVAN?
’n Organiese boer dink eerstens aan die grond. Die organiese produksiestelsel bou grond op pleks van om dit uit te put, soos in konvensionele boerderystelsels. Dis omgewingsvriendelik en bevorder biodiversiteit. Dis ook koolstof-negatief. Die resultaat is gesonde voedselprodukte.
WATTER SOORTE KRUIE VERBOU JY EN WAAR BEMARK JY DIT?
Roketslaai is my grootste verkoper. Ek verkoop ook slaaipakke met blaarslaai en ander eetbare groenighede. Verder verbou ek roosmaryn, Italiaanse pietersielie, tiemie, oreganum, salie, wilde roket, sprietuie, knoffel-sprietuie, basiliekruid, sitroengras en Viëtnamese koljander. Dit word in groot maat of in 40 g-pakkies in klein- en groothandelwinkels in Pietermaritzburg en Durban verkoop. Ek verkoop ook kruieplantjies in potte
op die Karkloof-boeremark.
WAT IS ’N ORGANIESE BOER SE GROOTSTE UITDAGING?
Tyd! Organiese stelsels werk met die natuur en vaar gevolglik die beste wanneer die natuur se pas gevolg word. Die probleem is wanneer organiese boerdery die vinnige pas van ons ekonomiese stelsel ontmoet. Dit duur ongeveer 8 jaar tot 10 jaar om ’n organiese boerdery-omgewing te skep. Boere soek weens finansiële druk kortpaaie, wat in mislukking eindig. Organiese plase is ook meer arbeidsintensief, wat die produksiekoste laat styg.
IS DIE KLIMAAT IN JOU GEBIED IDEAAL VIR GROENTE- EN KRUIEPRODUKSIE?
Ons gebied is nie uitstekend vir kruieen groenteproduksie nie. Ons is in ’n somerreënstreek met warm, humiede somers geleë, wat swamsiektes laat gedy. Donsige skimmel maak dit moeilik om goeie basiliekruid te produseer. Ons ervaar ook al die afgelope twee jaar ’n droogte.
MET WATTER KRUIESOORT KOOK JY GRAAG?
Ek eet roket die meeste. Ek hou daarvan in slaaie, en dis wonderlik in ’n potjie. Ek hou ook van die geure van roosmaryn en basiliekruid. Niks kom by gebakte lamsvleis met roosmaryn nie, en basiliepesto is my gunsteling-pastasous.