’NTYDTOEKERSFEES NOGKERSFEESWAS…
Toe ek deur julle Somer-weergawe van Boerekos blaai, het ek dadelik nostalgies geraak. Die herinneringe van my kinderdae het oor my gespoel, van my Ouma wat douvoordag opgestaan het om seker te maak dat die blikke vol koekies, die flesse vol ingelegde vrugte en tuisgemaakte konfyt was.
Die koekblikke het natuurlik nie vol koekies gebly nie, want ons kinders het baie innoverende maniere uitgedink om uit die “weggesteekte” koekblikke koekies te “steel”, ongeag hoe hoog of hoe ver dit buite ons bereik gebêre is. Die koolstoof is al vroegoggend gestook om seker te maak dis net die regte temperatuur vir die brood of beskuit wat nou-nou gebak gaan word, waarna die reuk van vars gebakte brood, beskuit, vanielje en kaneel natuurlik die huis gevul het.
Kersfees by Oumie was plein gesê: “Magical.” Dit was voor alles kommersieel geword het en waar liefde, familie en samesyn nog saak gemaak het, en nie die grootte of koste van die geskenk nie. Waar jy in bewondering opgekyk het na die sterreruim se merkwaardigheid en alomasemrowendheid van die Here se Skepping, en waar stories vertel is hoe die Melkweg eintlik deur Kersvader se slee en bokkies nagelaat is.
My Ouma was ’n fenomenale vrou en haar hande het vir niks verkeerd gestaan nie. Sy is in 1996 skielik aan ’n hartaanval oorlede en het ’n groot leemte gelos, maar sy sal vir ewig in ons harte saamleef. Die herinneringe sal altyd by my bly en ek verlang terug na ’n eenvoudiger tyd waar Kersfees nog Kersfees was en waar families nog in liefde bymekaar gekom het.
As huldeblyk aan my Ouma het ek het besluit om terug te gaan na my wortels en geskenke vir familie en werkskollegas te maak: ’n boks vol verskillende tuisgemaakte koekies, mooi in sakkies en linte toegedraai sowel as tuisgemaakte tamatieblatjang.
Dit was harde werk en lang ure en nagte, maar dit was die moeite werd en bevredigend, veral as jy toekyk hoe vinnig die inhoud van daardie bokse verdwyn het. Niks kan daardie lekker, warm hartsgevoel vervang nie.
Sedert ek Boerekos koop, kan ek eenvoudig nie vir die volgende uitgawe wag nie. My hande jeuk al klaar en die volgende uitgawe is nog nie eens op die rak nie! IRENEJANSEVANNOORDWYK Krugersdorp, Johannesburg
is op Facebook! Gesels met ons kosredakteur oor resepte, loer wat gebeur agter die skerms by fotosessies, leer meer oor plaasprodukte en kry resep-inspirasie. Daar is ook gereeld lekker kompetisies waaraan jy kan deelneem.