Skaapvleispastei
Hierdie resep kan jy ewe maklik met wildsvleis maak. Die uieringe wat saam met die kors gebak word, verleen baie lekker geur en tekstuur aan die pastei.
Vulsel 1,5 kg stoweskaapvleis op die been Sout en vars gemaalde swartpeper Olie, vir braai 2 kruienaeltjies 5 wonderpeperkorrels 3 takkies roosmaryn Water 30 ml botter of olyfolie 2 uie, gekap 5 knoffelhuisies, fyn gekap 500 ml vleisaftreksel 10 ml sout 60 ml koekmeel 5 ml mosterdpoeier 60 ml tamatiepasta
Slap deeg 250 ml melk 250 ml kookolie 2 eiers 430 ml koekmeel 20 ml bakpoeier 3 ml sout
1 ui, in ringe gesny (vir versiering)
Geur die vleis goed met sout en peper en braai dit in lotte in ’n swaarboompot bruin in ’n bietjie olie. Sit nou die naeltjies, wonderpeper en roosmaryn by en bedek alles met water. Verhit tot kookpunt en kook tot die vleis só sag is dat dit van die bene afval en die vloeistof in die pot min is. Laat effens afkoel en sny die vleis van die bene af en vlok grof. Meng die vleis met die bietjie kookvloeistof wat in die pot agtergebly het en hou dit eenkant. Verhit die botter of olie en braai die uie tot sag en gaar. Voeg die knoffel by en braai vir ’n paar sekondes. Sit die vleismengsel daarby en laat deurkook. Voeg die aftreksel en sout by. Meng die meel, mosterdpoeier en tamatiepasta tot daar geen klonte in is nie en voeg dit by die vleis. Laat dit goed deurkook, terwyl aanhoudend geroer word. Geur na smaak en skep in ’n gesmeerde pasteibak. Voorverhit die oond tot 180 °C. Vir die deeg: Klits die melk, kookolie en eiers saam. Meng die meel, bakpoeier en sout in ’n ander bak en voeg die melkmengsel by. Klits tot glad en giet oor die vleisvulsel. Pak ’n paar uieringe op die rou beslag en bak vir 30 minute tot die deeg uitgerys en goudbruin is. Sit voor met rys en groente of slaai van jou keuse. Lewer 8-10 porsies.