Pardoemskoek
Toe hierdie resep van die skrywer Madeleine van Biljon destyds verskyn het, het almal dit vir Kerstyd begin bak, vertel Annatjie. En sy bak dit steeds graag, maar sit growwe stukke groenvyekonserf by die beslag. Die koek het sy eienaardige naam gekry omdat die beslag so swaar van die vrugte moet wees dat dit “pardoems” in jou maag val. Die beslag het betreklik min botter en eiers, maar ’n hele kilogram vrugte.
200 g (340 ml) rooi glanskersies, met kookwater afgespoel en in kwarte gesny 25 ml brandewyn 10 ml kakao 10 ml kitskoffiepoeier 500 ml kookwater 1 kg vrugtekoekmengsel( rosyne, sultanas, korente, dadels, kersies, gevlokte amandels en sitrusskil) 7 ml koeksoda 375 ml witsuiker 125 g botter of margarien 3 ekstragroot eiers, geklits 750 ml koekmeel 7 ml bakpoeier 1 ml sout 5 ml gemengde speserye 5 ml fyn gemmer 25 ml brandewyn, om oor te sprinkel
Voorverhit die oond tot 140 °C en voer ’n gesmeerde koekpan van 23 cm met drie lae bakpapier uit. Draai ’n paar lae bruinpapier om die koekpan om dit verder te isoleer. Marineer die glanskersies in die brandewyn. Los die kakao en koffiepoeier in die kookwater op en voeg by die vrugtekoekmengsel, koeksoda en suiker in ’n groot kastrol. Verhit tot kookpunt en laat prut vir 5 minute. Verwyder van die hitte. Voeg die botter en gemarineerde kersies (saam met die brandewyn) by en roer goed. Laat afkoel en roer die geklitste eiers by. Gooi die droë bestanddele oor die vrugtemengsel en meng goed. Skep die beslag in die voorbereide pan. Sit die pan op ’n hele paar velle bruinpapier in die oond (dit isoleer die pan ook van onder af en keer dat die koek te donker aan die onderkant bak). Sit ’n stuk foelie (met die blink kant na buite) op die vrugtekoek. Bak vir ongeveer 4½ uur of tot ’n toetspen skoon uit die koek kom. Laat die koek in die pan afkoel en sprinkel die brandewyn oor. Verwyder die koek uit die pan wanneer dit heeltemal afkoel het. Verseël die koek dig met dik tinfoelie en bêre vir ongeveer ’n week voor dit gesny word. Lewer 1 groot vrugtekoek.