RESEPTE Gunsteling-vlakoek
Beslag 250 ml koekmeel 75 ml mielielblom 5 ml bakpoeier 1 ml sout 5 eiers, geskei 250 ml strooisuiker 100 ml yswater
Vlavulsel 500 ml melk 75 ml vlapoeier 1 ml sout 125 g sagte botter 250 ml strooisuiker 5 ml vanieljegeursel Paar druppels amandelgeursel
Geroosterde klapper
Voorverhit die oond tot 180 °C en smeer twee koekpanne van 20 cm elk. Voer met bakpapier uit en smeer weer. Sif die meel, mielieblom, bakpoeier en sout saam. Klits die eiergele en strooisuiker saam tot romerig. Klits die yswater geleidelik by. Vou die droë bestanddele by die eiermengsel in. Klits die eierwitte tot stywe punte vorm en vou dit ook in. Verdeel die beslag tussen die panne en bak vir 25-30 minute tot gaar. Laat die koeke vir 5 minute in die panne afkoel en keer dan op ’n draadrak uit om tot kamertemperatuur af te koel.
Vir die vulsel, verhit 400 ml van die melk. Meng die res van die melk met die vlapoeier en sout tot glad. Roer die vlamengsel by die warm melk in en verhit stadig, terwyl geklits word, tot kookpunt. Prut tot verdik en gaar. Laat afkoel. Verroom die botter en strooisuiker tot lig en donsig. Roer die vanielje- en amandelgeursel by en klits die koue vla lepel vir lepel by. Sny elke koeklaag in twee dunner lae en smeer die vulsel tussen die lagies en op die koek. Rond af met geroosterde klapper. Lewer 1 groot koek (14-16 porsies).