Botterskorsie met maalvleis-en-kaasvulsel
2 klein botterskorsies, in die lengte deurgesny 30 ml olie 1 ui, gerasper 2 elk knoffelhuisies en brandrissies, gekap 5 ml elk komyn en koljander 250 g beesmaalvleis 80 ml water 45 ml gekapte pietersielie Sout en swartpeper na smaak 125 ml ricotta 125 ml gekrummelde fetakaas
Brandrissiesous van jou keuse 2 avokado’s, in klein blokkies gesny Vars koljanderblare, om af te rond
Voorverhit die oond tot 180 °C en voer ’n bakplaat met foelie uit. Skep die botterskorsies se pitte uit en verf met ’n lagie olie. Bak vir 30 minute tot halfgaar. Verhit intussen die res van die olie in ’n pan en braai die ui, knoffel en brandrissie daarin tot sag. Voeg die komyn, koljander en maalvleis by en braai tot gaar. Voeg die water by, verhit tot kookpunt en prut vir 15 minute. Roer die pietersielie en geurmiddels by en verdeel die vulsel tussen die vier halwe botterskorsies. Bak die gevulde skorsies vir 25 minute. Meng die twee soorte kaas, sprinkel oor die botterskorsies en bak vir nog 5 minute. Sprinkel die brandrissiesous en avokado oor. Rond af met vars koljanderblare en sit voor met slaai. Lewer 4 groot porsies.