Varkvleisburgers met camembert en Pinotage-vye
Die kombinasie van smake in hierdie burger is hemels. Die rokerige geur van die spekvleis in die burger is nommerpas by die rooiwynsous en soet vye.
Varkvleis-burgerkoekies 500 g gemaalde varkvleis 250 g (1 pak) spekvleis, baie fyn gesnipper 3 ml koljander 3 ml komyn 5 ml sout 3 ml vars gemaalde swartpeper 1 ui, gerasper 2 knoffelhuisies, baie fyn gekap 30 ml gekapte, vars kruie van jou keuse
Pinotage-vye 100 ml Pinotage 45 ml balsamiese asyn 45 ml bruinsuiker of heuning 1 kaneelstok 2 heel steranyssade 2 ml elk sout en vars gemaalde swartpeper 8 ferm vye, in dik skywe gesny
6 hamburgerrolletjies Olyfolie Groot hand vol roketblare 1 camembert, in dun skywe gesny
Meng ál die bestanddele vir die koekies saam en verdeel die mengsel in ses gelyke
dele. Vorm ses vleiskoekies en verkoel vir 30 minute. Terwyl die vleiskoekies rus, maak die Pinotage-vye: Verhit die Pinotage, balsamiese asyn, bruinsuiker of heuning, kaneelstok, steranyssade, sout en peper in ’n pan oor lae hitte tot kookpunt. Prut vir 1-2 minute en pak dan die gesnyde vye in die sous. Prut verder tot die vye deurdrenk is met die sous, maar nie papgekook is nie. Hou eenkant.
Verhit ’n bietjie olyfolie in ’n pan en braai die burgerkoekies daarin tot goudbruin aan elke kant. Skep van die Pinotage-sous uit die pan waarin die vye geprut is en giet dit oor die burgerkoekies. Laat die burgerkoekies verder in die Pinotage-sous prut tot net-net gaar (die sous sal ’n heerlike, klewerige sous om die vleis vorm.) Pak nou ’n skyf of twee camembert op elke burgerkoekie en bedek die pan weer. Laat die hitte van die pan die kaas sag maak en smelt.
Sny die hamburger rolletjies middeldeur en verf die gesnyde kante met olyfolie. Druk die rolletjies vinnig onder ’n warm oondrooster of rooster die gesnyde kante in ’n warm, droë pan tot goudbruin. Sit ’n paar roketblare op elke rolletjie, gevolg deur die vleis met die gesmelte camembert. Skep van die Pinotagevye heel bo-op en rond af met ’n lepel van die sous. Sit dadelik voor. Lewer 6 burgers.