Hoender

Veelsydig, gou gaar en almal se gunsteling. ’n Lekker hoendergereg – of dit vir die braairooster, oond of piekniekmandjie is – sal altyd aftrek kry.

BASI ESE SNITTE

1. Nek ( neck). Soos enige ander vleis met baie bene, is hoendernekkies uiters geurig. Ek gebruik dit graag saam met bene en afvalstukkies vleis vir tuisgemaakte hoenderaftreksel. 2. Borsfilet ( breast fillet). ’n Groot, maer vleissnit met ’n digte, fyn tekstuur. Die vleis kan maklik droog wees as dit oorgaar gemaak word, maar borsies is ’n gewilde snit vir veral laevetgeregte. 3. Rug ( back). Soos die nek, bevat die rug baie beentjies, maar ook heelwat vet. Dit is nie ’n snit wat as ete opgedis gaan word nie, maar moet dit asseblief nie weggooi nie — dit is baie waardevol vir die aftrekselpot. 4. Vlerkie ( wing). Baie mense sê hoendervlerkies is die lekkerste deel van die hoender. Sag, sappig en propvol geur. Marineer en oondrooster dit of braai oor die kole tot bros. 5. Boudjie ( drum stick). ’n Uiters veelsydige snit. Dit het ’n lekker stuk sagte, sappige vleis. Jy kan boudjies oondrooster, diep braai of stowe en dit warm of koud geniet. 6. Dy ( thigh). Die hoender se dy is my gunstelingsnit om mee te kook. Die vleis is sag, sappig en geurig. Dyvleis maak heerlike sosaties, en dit is maklik om ’n geurige vulsel onder ’n hoenderdy se vel in te stop.