Groenolyf-en-kruiebotter
Deur die olywe in die oond te dehidreer, sorg jy dat die botter ’n gekonsentreerde olyfgeur het. Saam met die romerigheid van botter en die varsheid van vars kruie vorm dit ’n perfekte smaakkombinasie.
100 g ontpitte groen olywe, goed gedreineer 45 ml fyngekapte basiliekruid 250 g ongesoute botter, teen kamertemperatuur
Voorverhit die oond tot 160 °C en sprei die olywe in ’n enkellaag op ’n bakplaat. Bak die olywe vir ongeveer 30-40 minute tot droog en effens verrimpeld. Haal uit die oond en laat afkoel. Sodra die olywe kamertemperatuur bereik het, sit dit in ’n voedselverwerker en pols tot fyn gekap. Voeg die basiliekruid en botter by en pols verder, tot goed gemeng. Skep die botter uit in ’n geskikte vorm of bakkie en verkoel tot benodig. Lewer ongeveer 350 g botter.