Steaksosaties met groenkruiesous
2 kg steak van jou keuse
Olyfolie-marinade 1 groot ui, baie fyn gekap 125 ml olyfolie 4 knoffelhuisies, fyn gekap 125 ml vars suurlemoensap 40 ml sojasous 10 ml aangemaakte mosterd 5 ml vars gemaalde swartpeper
Sny die steak in hapgrootte blokkies en pak in ’n nie-metaalbak. Braai die ui oor matige hitte in die olie tot sag. Voeg die knoffel by en braai vir ’n minuut. Verwyder van die hitte en laat staan vir 10 minute. Roer nou die suurlemoensap, sojasous, mosterd en swartpeper by. Laat die marinade goed afkoel en giet oor die vleis. Bedek en verkoel vir minstens 3 uur (verkieslik oornag). Ryg die vleis op sosatiestokkies en laat dit kamertemperatuur bereik voor jy dit vinnig oor baie warm kole braai tot liggaar. Laat rus vir 5 minute. Sit voor met die sous. Lewer 8 porsies.
Groenkruiesous
Verwerk ’n groot hand vol roket, ’n groot hand vol basiliekruid, 2 ansjovisfilette, 45 ml kappertjiesaad en die sap en fyngerasperde skil van 1 groot suurlemoen in ’n voedselverwerker tot glad. Geur na smaak met sout, peper en ’n knippie suiker, indien nodig. Lewer 250 ml sous.