Melktertmelkskommel met varkore
Melkskommel 1 liter vanieljeroomys 1 liter volroommelk 10 ml fyn kaneel ’n Druppel amandelgeursel
’n Druppel karamelgeursel Ekstra fyn kaneel, om oor te sprinkel
Verwerk die roomys, melk, kaneel en geursels in ’n menger tot glad en dik. Verdeel die mengsel tussen 8 glase en sprinkel fyn kaneel oor. Sit elke melkskommel met ’n varkoor (resep hieronder) voor. Lewer 8 porsies.
Varkore (palmiers) 250 g skilferkorsdeeg van goeie gehalte 250 ml kaneelsuiker
Verdeel die skilferkorsdeeg in die helfte en werk met een deel op ’n slag. Besprinkel die werksoppervlak mildelik met suiker (pleks van meel) en rol die deeg in ’n reghoek van 15 cm x 30 cm. Besprinkel die deegreghoek met nog ’n lagie kaneelsuiker. Rol die deeg in die lengte van weerskante af op sodat dit in die middel ontmoet. Druk effens plat en sny dan in skywe. Herhaal met die oorblywende deeg. Besprinkel bo-op ook met kaneelsuiker en verkoel tot yskoud. Voorverhit intussen die oond tot 220 °C en bak vir ongeveer 10 minute tot liggoudbruin, opgepof en bros. As die onderkante nog effens bleek is, draai dit om en bak vir ’n verdere 3 minute tot liggoudbruin. Laat goed afkoel en bêre in ’n lugdigte houer tot jy reg is om dit te verpak. Lewer ongeveer groot 20 varkore.
Nota: Skilferkorsprodukte smaak op hul lekkerste wanneer dit vars gebak is. Moet die palmiers dus verkieslik nie té lank voor gebruik bak nie.