Aspersies op die Italiaanse manier
24-36 aspersies Gerasperde kaas Sout Peper Botter Broodkrummels
Bind die aspersies in ’n los bossie en kook in water met ’n bietjie sout tot dit sag is. Dreineer. (Indien ’n blikkie aspersies gebruik word, moet dit in die water waarin dit is, opgewarm word.) Plaas ’n laag aspersies in ’n oondvaste bak. Strooi kaas, sout, peper en stukkies botter oor, pak weer ’n laag aspersies en daarop weer ’n laag kaas. Plaas stukkies botter hier en
‘ “Veels geluk” op Kersfees veronderstel vrolikheid, blydskap, ’n stemming van huislike, gesellige behaaglikheid. Ek erken dit kan heers waar die kos maar skraal is en ook waar daar van drank hoegenaamd geen sprake is nie. Maar ek besef net so goed dat dit makliker te verkry is waar die fees gevier word rondom ’n tafel wat goed bedek is en waar die gasheer daarvoor gesorg het dat daar ’n gepaste hoeveelheid goeie drank voorgesit word.’ — C. Louis Leipoldt
daar, strooi broodkrummels oor en bak teen 180 °C tot die broodkrummels verbruin. Lewer 4-6 porsies.
‘Medaljes van vlees’ met pietersieliebotter, geroosterde tamatie en gebraaide, jong aartappels
In 1980 het nog ’n kos-ikoon, Peter Veldsman, die mooiste kookboek, Eet saam met Leipoldt, saamgestel. Daarin het hy 12 spyskaarte (een vir elke maand van die jaar) ontwerp met Leipoldt se resepte. Ek het dié beesvleisresep uit Peter se boek gekry. Hy het Leipoldt se oorspronklike resep vir beesfiletmedaljons uit Kos vir die kenner effens aangepas deur onder meer die vleis net vinnig te panbraai pleks van om dit te smoor.
Pietersieliebotter 75 ml botter 10 ml suurlemoensap 1 ml gemaalde swartpeper 25-30 ml fyngekapte pietersielie
‘Medaljes’ 6 “medaljes” (uit die ronde deel van die beesfilet gesny en 40 mm dik) Sout en peper Suurlemoensap 125 ml witwyn Uie Sout en peper 3 tamaties
Pietersieliebotter: Maak botter met ’n houtlepel sag. Voeg die res van die bestanddele by en meng goed. Druk vas in ’n bakkie en plaas in die koelkas. Sny in blokkies sodra dit hard is. ‘Medaljes’: Braai die vleis vinnig aan albei kante bruin in ’n geriffelde gietysterpan. Geur met sout en peper. (Sit elke “medalje” op ’n stukkie geroosterde brood.) Voeg suurlemoensap, wyn en uie by pansappe en kook tot die sous dik is. Proe en geur. Skep oor die vleis. Garneer elke “medalje” met ’n halwe gebraaide tamatie waarop ’n blokkie pietersieliebotter geplaas is. Sit voor met gebraaide, jong aartappeltjies. Lewer 6 porsies.
Wynskuimpoeding
Dié maklike poeding het my uitgeboul. Die kombinasie van muskadel- en sitrusgeure saam met saggeklopte room is eenvoudig fantasties. En die neutmuskaat, wat vars oorgerasper word net voor die nagereg voorgesit word, verleen net die regte tikkie aardse speserygeur aan die poeding. Probeer dit gerus. Dis basies ’n boere-sabayon; ’n geskenk van Leipoldt wat ek beslis van nou af gereeld gaan maak en ’n heerlike, anderste manier om Suid-Afrika se fantastiese muskadel te geniet.
250 ml room 250 ml soet witwyn (gebruik goeie, wit muskadel) Sap van 1 suurlemoen Grypie fyngerasperde suurlemoenskil 80-100 g strooisuiker Neutmuskaat
Klits die room, soetwyn, suurlemoensap en -skil en strooisuiker goed saam tot dit skuim. Skep die skuim af en vul glase daarmee. Rasper neutmsukaat oor. Sit die poeding net so of met beskuitjies voor. Lewer 4 porsies.