Appelkos en klapper
Die kombinasie van soetsuur appelkoos en klapper is eie aan ’n Hertzoggie, maar werk ook lekker in ander soetgoed of nageregte.
Klapper- panna cotta met appelkoosjellie
’n Lekker ligte nagereg, perfek vir die somer.
Appelkoosjellie 1 liter appelkoossap 30 ml gelatien
Panna cotta 15 ml gelatien 30 ml koue water 250 ml klappermelk 100 ml strooisuiker 3 ml fyn kaneel 5 ml vanieljegeursel 1 liter dik, natuurlike jogurt
Spuit ’n geskikte poedingvorm met ’n inhoudsmaat van 2,5 liter met kleefwerende kossproei. Appelkoosjellie: Verhit 900 ml van die appelkoossap in ’n kastrol tot kookpunt. Terwyl die sap verhit word, sprinkel die gelatien oor die oorblywende 100 ml sap en laat staan om te spons. Sodra die sap in die kas- trol kookpunt bereik, verwyder van die hitte. Voeg die gelatienmengsel by en roer tot glad. Giet die mengsel in die voorbereide poedingvorm en laat stol oornag in die yskas. Panna cotta: Sprinkel die gelatien oor die koue water en laat eenkant staan tot gespons. Verhit intussen die klappermelk, suiker en kaneel tot net onder kookpunt. Verwyder van die hitte en roer die vanieljegeursel en die gelatienmengsel by. Roer tot die gelatien gesmelt en die mengsel glad is. Laat afkoel tot die mengsel effens begin verdik en roer die jogurt by. Giet die panna cotta-mengsel oor die jellie en verkoel tot gestol. Om voor te sit, keer die nagereg op ’n opdienbord uit en sit voor met klappervla. Lewer 10 porsies.
Hertzoggie-laagkoek
Dié ligte warmmelksponskoek en outydse gekookte kondensmelk pas perfek by die klappermeringue. Bak die sponskoek ’n dag voor jy dit versier, dan sal dit makliker in lae sny en minder krummel.
Warmmelksponskoek 125 ml volroommelk 125 ml water 100 ml olie 4 ekstragroot eiers, teen kamertemperatuur 375 ml suiker 10 ml vanieljegeursel 500 ml koekmeel 10 ml bakpoeier
Knippie sout
Vulsel 1 blik (360 g) gekookte kondensmelk 180-250 ml gladde appelkooskonfyt
Klappermeringue 4 ekstragroot eierwitte, teen kamertemperatuur 450 ml strooisuiker 60 ml koue water 200 ml klapper, liggies gerooster en afgekoel
Voorverhit die oond tot 180 °C en smeer twee koekpanne van 20 cm liggies met olie. Voer uit met bakpapier en smeer weer. Verhit die melk, water en olie in ’n klein kastrolletjie tot kookpunt. Verwyder van die hitte en laat afkoel. Klits intussen die eiers goed. Voeg die suiker lepel vir lepel by die eiers, terwyl jy aanhou klits, tot die mengsel liggeel en donsig is en in ’n dik lint van die klitser afloop as jy dit uit die bak lig. Klits die vanieljegeursel by. Sif die meel, bakpoeier en sout in ’n afsonderlike mengbak. Voeg die eiermengsel daarby en vou liggies in. Voeg die melkmengsel by en vou verder in tot ’n gladde beslag vorm. Moenie die beslag te veel roer of klop nie, want dit kan veroorsaak dat die koeke nie na wense rys nie. Verdeel die beslag gelykop tussen die twee panne en bak vir 20-25 minute tot hoog uitgerys en strooikleurig. Haal uit die oond en laat die koeke vir ’n paar minute in die panne afkoel. Keer uit op ’n draadrak en laat afkoel tot kamertemperatuur. Bêre dit in ’n lugdigte houer tot jy dit wil versier.
Sny elke sponskoek in drie lae. Smeer ’n dun laag kondensmelk op vyf van die koeklae en dan ’n dun laag appelkooskonfyt op die kondensmelk. Stapel die lae netjies op mekaar met die ongesmeerde koeklaag bo-op. Verkoel die koek vir ongeveer 30 minute terwyl jy die klappermeringue maak. Gooi die eierwitte, suiker en koue water in ’n groot hittebestande mengbak en klits tot goed gemeng. Sit die bak oor ’n kastrol met ’n bietjie water wat liggies prut en klits met ’n elektriese klitser vir sowat 15 minute tot die mengsel stywe punte vorm. Laat afkoel. Vou die klapper daarby in. Bedek die hele koek met die klappermeringue en gebruik ’n gasbrander om die meringue liggies te skroei. Lewer 18-20 porsies.
Appelkoosmalvalekkers met geroosterde klapper
375 ml appelkoossap 60 ml gelatien 500 ml strooisuiker 30 ml glukosestroop 1 vanieljepeul, in die lengte gehalveer en saadjies uitgeskraap 4 eierwitte, teen kamertemperatuur
375 ml geroosterde klapper
Smeer ’n reghoekige bak of pan van ongeveer 30 cm x 20 cm liggies met olie of spuit met kleefwerende kossproei. Gooi 125 ml van die appelkoossap in ’n hitte- en mikrogolfbestande bak en voeg die gelatien by. Klits tot goed gemeng. Laat staan vir 5 minute en smelt dan die gelatienmengsel in die mikrogolfoond. (Wees versigtig wanneer jy dit doen – mikrogolf die mengsel net vir ’n paar sekondes op ’n slag en wees versigtig dat dit nie kook nie.) Sodra die gelatien opgelos is, klits goed deur en hou eenkant. Verhit die res van die appelkoossap saam met die strooisuiker en glukosestroop stadig oor lae hitte, terwyl geroer word, tot die suiker opgelos is. Kook die suikermengsel vir sowat 10 minute of tot dit die hardebalstadium (127 °C op ’n suikertermometer) bereik het. Sodra die suikermengsel die regte stadium bereik het, voeg die vanieljesaadjies by en klits daarna die gelatienmengsel by. Die mengsel sal borrel en opkook – hou aan klits tot die mengsel glad is. Klits die eierwitte met ’n elektriese klitser tot stywe punte vorm. Terwyl jy klits, voeg die gelatien-ensuikerstroopmengsel in ’n dun straaltjie by. Hou aan klits tot die mengsel dik, blinkwit en donsig is. Giet die mengsel in die voorbereide bak (of pan) en smeer gelyk. Laat staan teen kamertemperatuur om te stol (verkieslik oornag). Sny die malvalekker in blokkies en rol in geroosterde klapper. Lewer 40 malvalekkers.
Klapperryspoeding met appelkooscompote
Dié romerige nagereg met sagte speserygeure kan warm of koud voorgesit word.
Ryspoeding 250 ml Basmati- of jasmynrys Knippie sout 180 ml suiker 1 liter volroommelk 1 blik (440 g) klapperroom 1 kaneelstok 1 vanieljepeul, gehalveer en uitgeskraap
Appelkooscompote 1 blik (420 g) geblikte appelkose in stroop 1 kaneelstok 100 ml suiker 45 ml suurlemoensap of appelkoossap
Ryspoeding: Verhit die rys, sout, suiker, melk, klapperroom, kaneelstok en vanieljepeul en -saadjies stadig oor lae hitte, terwyl geroer word, tot kookpunt. Sodra die melk kook, verlaag die hitte en prut stadig, terwyl aanhoudend geroer word, tot die rys uitgeswel en sag is. Appelkooscompote: Verhit ál die bestanddele saam en prut tot die sous stroperig is. Sit voor op die ryspoeding. Lewer 6 porsies.