Frikkadelle

Ons liefde vir bolletjies vleis kom van die Hollanders af, wat dit al sedert die vroeë 1600’s maak. Claassens skryf dat die eerste frikkadelle aan die Kaap waarskynlik van robvleis gemaak is, aangesien dit volop was. In ’n Hollandse resepteboek wat uit 1668 dateer, is frikkadelle al met neutmuskaat gegeur en sonder eiers gemaak, wat natuurlik daaraan ’n los tekstuur gee – presies wat jy in ’n frikkadel wil hê. Daar word in dieselfde boek ’n resep gegee vir hardgekookte eiers wat in frikkadelvleis toegevou word (soos Skotse eiers vandag). ’n Derde variasie is frikkadelle in kropslaai – ’n variasie op ons geliefde koolfrikkadelle wat sy oorsprong in antieke Griekeland het. “Daar is soveel frikkadelresepte soos daar kokke is,” skryf boerekoskenner Dine. “Ongelukkig is daar mense wat allerhande onheilighede by die mengsel voeg, soos ’n pakkie uiesop. Pleks daarvan kon ’n bietjie gerasperde ui en sout bygevoeg word, en ’n takkie pietersielie.”