Wors en biltong

Wors word al van die vroegste tye af gemaak. Leipoldt het geskryf dat die wors wat hy in Frankryk geëet het, die naaste was aan ons boerewors. Maar dit was inderwaarheid die koljanderbraaiwors wat deur die Duitsers gemaak is, wat boerewors se voorloper was. Om vleis te bewaar, is dit natuurlik gepekel en berook of gedroog. Hoewel Van Riebeeck by verskillende geleenthede verwys het na gedroogde robvleis waarvan hulle baie geëet het, is dit nie in sy tyd biltong genoem nie. Die woord “biltong” het eers laat in die 18de eeu opgeduik. Vet is ook gebruik om vleis te preserveer. Uitgebraaide seekoeispek, varkvet of skaapvet is gebruik om gaar vleis lugdig te seël, soorgelyk aan die Franse se confit- vleis.