GROENTE HOORT OP ’N PLAASTAFEL

Dis al jare lank nie net nagereg, konfyt, koek en tert wat ons soettande tevrede hou nie, maar ook ’n skeppie soet groente saam met vleis. Gestoofde patats, soetworteltjies, soet ertjies en pampoenkoekies is van die vroegste tye af op Afrikaanse tafels voorgesit. ’n Resep vir dun skyfies pampoen tussen lagies gebotterde brood wat met suiker besprinkel is, dateer uit ’n ou Hollandse resepteboek en is soortgelyk aan ons broodpampoen. Pampoenmoes is met eiers dikgemaak en gebak – nes ons pampoentert van vandag. Resepte om vars vrugte en groente te bewaar, geniet in ou resepteboeke groot aandag. Konfyt, blatjang en atjar is van enige denkbare vrugte- of groentesoort gemaak. Voor daar styfpassende deksels vir houers was waarin dit bewaar kon word, is die blaas van slagdiere gerek, oor die houers getrek en styf vasgebind.