WEEG EN KLASSEER

Massamatic van Parow het sy outomatiese Iconix-drierigtingskaapskaal-en-werker op die vorige Agri Megaweek buite Bredasdorp vertoon. Dit is ideaal vir skaapklassering. Die skaap trap in die drukgangetjie op ’n valdeur wat die hekkie agter hom sluit en die hekkie voor hom oopmaak. Hy stap dan deur om geweeg te word. Die dier kan óf volgens gewig óf volgens gewigstoename of -verlies geklasseer word. Alle data word op ’n FX41-rekenaarstelsel gebêre. Die stelsel het drie hekkies waardeur die skaap – volgens die klasseringsnorme – na buite kan gaan. Die stelsel kos R130 000.