Wol: Daar is nié prysweerstand
Hoewel die huidige ekonomiese onsekerheid in China skommelinge in kommoditeitspryse tot gevolg het, is dit in die geval van wol nie weens prysweerstand wat ingetree het nie. Die internasionale vraag na wol bly goed. Die verswakking van die rand en die Australiese dollar teenoor die Amerikaanse dollar en die euro het eerder stukrag aan die wolmark verleen, sê mnr. Geoff Kingwill, voorsitter van Cape Wools.
Oor die rede waarom die prysgaping tussen superfyn- en sterker wol so verklein het, sê hy dis te wyte aan boere wat ’n paar jaar gelede, toe daar ’n groot pryspremie vir die fyner tipes was, goed op die markseine gereageer het en gesorg het dat daar nou genoeg daarvan is om in die vraag te voorsien. “Ek dink nie boere sal voortgaan om hul skeersels nóg fyner te maak nie.”
Hoewel ’n groot wolkoper onlangs op die Nasionale Wolkwekersvereniging se kongres gevra het boere moet dit oorweeg om eerder langer as korter wolskeersels te lewer, sê Geoff daar was nog geen markseine dat sesmaande- tot agtmaande-skeersels ongewens is nie. “In Suid-Afrika gaan ál minder boere twaalfmaande-skeersels lewer. Teling het só verbeter dat wol wat nou op 10 maande geskeer word, dieselfde lengte het as 12 maandeskeersels 20 jaar gelede. Wat dus van belang is, is die lengte van wol, nié die aantal maande wat dit op die skaap is voor dit afgeskeer word nie.”
Hy sê die goeie wolpryse van die afgelope vyf jaar het tot ’n styging in produksie gelei. Tans word goeie pryse vir Merino-ooie betaal. “As daar nie ’n ernstige droogte weens El Niño voorkom nie, kan produksie dié seisoen weer styg.”
Geoff sê ondanks die relatief goeie wolpryse kan bemarking nie agterweë gelaat word nie. Die 15 c/kg wat kopers aan Cape Wools oorbetaal (R4,5 miljoen) word hoofsaaklik vir die internasionale bevordering van die vesel gebruik.
Hy sê hoewel prysskommelinge op kort termyn kan voorkom, is dit betekenisvol dat wolpryse tydens die wêreldwye ekonomiese krisis verbeter het. “Waar die geleentheid hom voordoen, kan boere dus met ’n geruste hart hul produksie uitbrei.”