AUSTRALIESE STELSEL VAT DIE RAAIWERK WEG
Meat Standards Australia (MSA) is ’n eetgehalteprojek wat deur Meat and Livestock Australia Limited (MLA) ontwikkel is. Die MLA bestaan uit sowat 47 500 veeboere met belange in die onderneming. Die meeste van die MLA se finansiering kom van transaksieheffings op die verkope van lewende hawe. Die Australiese regering dra net soveel by as wat die MLA uit die transaksieheffings in navorsing en ontwikkeling belê.
Die MSA-graderingstandaarde is reeds 15 jaar gelede ontwikkel deur 100 000 verbruikers aan 700 000 bees- en skaapvleismonsters te laat proe en dit dan te beoordeel.
Die stelsel beoog om vir die verbruiker die raaiwerk uit die koop en gaarmaak van rooivleis uit die weg te ruim. Die stelsel oudit en akkrediteer alle belanghebbendes in die rooivleiswaardeketting en koppel hul handelsmerk aan alle produkte wat in die proses goedgekeur is. ’n Wye reeks produksiemetodes, verwerkingspraktyke, snitte, verouderingstydperke en gaarmaakmetodes vir bees en skaap is nagevors om die invloed daarvan op die eetgehalte van die vleis te bepaal.
Alle MSA-gegradeerde beesvleis word ondersoek en gegradeer ongeveer 24 uur ná ’n dier geslag is. Die eetgehaltegradering van beesvleis deur die MSA word afgelei van faktore wat onder meer ouderdom, hangmetode, hormoon-groeibevorderaars, beenverharding, marmering, vet op die ribbes, vleis-pH en temperatuur insluit. Die gradering word dan as ’n syfer tussen 0 en 8 uitgedruk, waar 0 op ’n uitstekende eetgehalte dui en dit so op die verpakking van die vleis aangedui word. ’n Aanbevole verouderingstydperk en die ideale gaarmaakmetode word ook op die verpakking aangedui.
Die stelsel word deurgaans hersien en bemark. Die MSA het byvoorbeeld reeds drie selfoontoepassings ontwikkel om verbruikers te help met die koop en gaarmaak van die perfekte stuk vleis.