Bou wildheinings maklik
Om ’n wildheining doeltreffend op te rig, verg balanseerwerk — tot mnr. Riaan van Wyk van Delareyville ’n paalstamper met ’n verlengstuk ontwerp het waarmee twee mense ’n lang paal met die hand in die grond stamp.
Om ysterpale vir ’n gewone beesheining in te slaan, is betreklik maklik. ’ n Ysterpaal van 1,8 m word eenvoudig van grondvlak af met ’ n swaar hamer ingeslaan. Wildheinings is egter ’n perd van ’n ander kleur. Ysterpale daarvoor is gewoonlik 2,4 m tot 3 m lank en jy moet op ’n konka, ’n 210 liter-drom of ’n leer staan om dit by te kom.
Mnr. Riaan van Wyk, ’n saaiboer van Delareyville in Noordwes, het ná navrae van boere ’n standaardpaalstamper verleng met buispyp wat as handvatsel dien en ’n voetstuk daaraan geheg. Só kan jy lang ysterpale in die grond kap sonder om ’n leer saam te sleep.
Die kern van die paalstamper is ’n gewig (’n stuk treinspoor) wat bo-op ’n pyp vasgesweis is. Die deursnee van die pyp wissel van 100 mm tot 150 mm. Twee stawe van buispyp word parallel aan die bo- en onderkant van die pyp vasgesweis en dien as handvatsels.
BENODIGDHEDE
Die gereedskap wat benodig word, is ’n hoekslyper, ’n sweismasjien, ’n hamer en bankskroef. Die materiaal is een ronde pyp (110 mm in deursnee x1 m), ’n stuk treinspoorstaaf (of enige soortgelyke gewig) van 200 mm, twee lengtes (3 m) buispyp van 25 mm en ’n strook platyster van 1 m (40 mm x 3 mm).
Sny eers die platyster-lengtes (40 x 3 mm): 1 x 500 mm vir die voetstuk, 1 x 500 mm vir ’n versterking en 2 kleiner versterkings x 200 mm.
Die verlangde hoogte van die heining gaan die lengte van die stamper se 25 mmbuispyp bepaal. As die heining 2,4 m hoog gaan wees, moet die algehele lengte van die paalstamper sonder die treinspoorgedeelte dus 2,4 m wees. Gebruik ’n langer lengte 25 mm-pyp as waarvoor jy beplan.
Buig die twee stroke platyster van 500 mm in ’n halfmaan. Buig die 25 mmbuispyp teen ’n helling van 45 grade op die punte, sowat 300 mm van elke ent af. Heg die 25 mm-buispyp aan die 110 mmstamppyp se bokant. Sweis die platyster haaks aan die kante van die 110 mm-pyp vas (met die 110 mm-pyp aan weerskante), en sweis dan die 25 mm-buispyp daaraan vas. Sweis die twee stroke 200 mm-platyster aan albei kante van die 110 mm-pyp én die 25 mm-pyp vas. Die platyster help om die pypgedeeltes makliker aan mekaar vas te sweis en versterk die struktuur.
Die halfmaan-platyster word onderaan die twee 25 mm-pype vasgesweis. Dit vorm die voetstuk van die paalstamper. Die tweede halfmaanvormige versterking word ’n paar sentimeter bo die voetstuk vasgesweis vir groter stabiliteit.
Laastens kom die treinspoorstaaf (gewig) op die 110 mm-pyp vas. Dié gedeelte moet deeglik vasgesweis word.
Sny die oortollige punte aan die onderkant af nadat die halfmaanvormige platyster op die verlangde lengte vir die voetstuk vasgesweis is. Die totale lengte vanaf jou halfmaan-voetstuk tot bo-aan die 110 mm-stamppyp moet uiteindelik 2 400 mm wees vir ’n 2,4 m-heining.
Wanneer die stamper se voetstuk tot op grondvlak ingestamp word, weet jy die ysterpaalisopsyregtediepteingeslaan. Al die ysterpale sal dan presies 2,4 m bo die grond uitsteek.
SÓ GEBRUIK JY DIT
Laat lê die ysterpaal en die stamper skuins. Druk die ysterpaal in die stamppyp in en tel dan die stamper en ysterpaal gelyk op. Twee mense hou die handvatsels vas en stamp die ysterpaal in die grond in. Wanneer die voetstuk die grond raak, word die stamper van die paal af opgelig en na die volgende ysterpaal gedra.
Aanvanklik sal die proses stadig verloop totdat die twee mense wat saamwerk hul tydsberekening gesinchroniseer het.