Bonsmaras haal eerste plek met genomika
Die Bonsmara het die eerste vleisbeesras in Afrika geword waarvoor genomiese seleksie ’n werklikheid is. Die eerste genomies verrykte teelwaardes vir dié ras is sedert 1 Julie beskikbaar, het die Bonsmara-beestelersgenootskap en SA Stamboek in ’n verklaring aangekondig.
Diere waarvoor genotipes in BLUP-ontledings ingesluit word, sal voortaan met ’n nuwe logo, GenoTyped, gemerk word.
Genomies verrykte teelwaardes vir Drakensbergers en Beefmasters behoort ook binne die volgende jaar beskikbaar gestel te word, sê dr. Bobbie van der Westhuizen, genetikus van SA Stamboek.
Hy sê die Bonsmara-beestelersgenootskap het al in 2012 die voortou op die gebied van genomika geneem toe op ’n algemene jaarvergadering besluit is om in genomiese seleksie te belê.
Aanvanklik het die genootskap en telers self betaal om genomiese profiele van invloedryke teeldiere te kry en ’n verwysingskudde met die hulp van Stamboekveekundiges te vestig. Die vestiging van die verwysingskudde is versnel toe die nasionale vleisbees-genomika-program, wat deur die agentskap vir tegnologievernuwing (TIA) gefinansier word, teen April 2015 tot stand gekom het.
Bobbie sê hierdie eerste stel genomies verrykte teelwaardes is danksy Bonsmaratelers se toewyding om prestasie oor jare nougeset te meet en aan te teken. Soveel moontlik invloedryke diere kon dus in die verwysingskudde ingesluit word.
Die genomiese profiele van vroulike diere wat ’n groot impak binne die ras het, is ook bekom. Belangrike ekonomie- se eienskappe wat net by verse en koeie gemeet kan word, kon dus ook beter aan genomiese profiele gekoppel word. Dié koeie het reeds akkurate BLUP-waardes vir onder meer ouderdom met eerste kalftyd, tussenkalfperiode en maternale invloed op geboorte- en speengewig.
Danksy telers se goeie deelname aan sentrale en plaas-groeitoetse, asook karkasskanderings, is daar reeds betroubare statistieke beskikbaar vir onder meer voerinname, onderhuidse vetlaagdikte, oogspieroppervlakte en marmering.
Die genomiese verryking van BLUPteelwaardes beteken die voorspelling van jong diere se genetiese meriete kan veel akkurater gedoen word, sê Bobbie. “Dit is veral van groot waarde waar eienskappe net by een van die twee geslagte gemeet kan word, soos die genetiese meriete van koeie om aan kleiner kalwers geboorte te skenk, swaarder kalwers te speen en vroeg in die seisoen as ’n vers te kalf en gereeld daarna te kalf,” sê hy.
“Eienskappe wat tradisioneel net by bulle gemeet word, soos voerinname en voeromsettingsdoeltreffendheid, en eienskappe wat met skandering gemeet word, soos oogspieroppervlakte en marmering, vind ook geweldig baat by die insluiting van genoominligting.”
Besoek die webwerf www.SABeefBulls.com om te sien of ’n geregistreerde Bonsmarabees se teelwaardes genomies verryk is of nie.