DEURBRAAK MAAK PRESISIETELING MOONTLIK
’n Vernuwende sagtewareplatform vir die teel van diere waarvolgens produsente hul doelwitte met groter presisie kan verwesenlik, is op ’n Overbergse melkplaas ontwikkel en in gebruik geneem. Van die voordele is dat dit inteling teenwerk en genetiese variasie bevorder.
Sedert die ingebruikneming van teelwaardes in 1990 in Suid-Afrika het inteling in plaaslike Jersey-kuddes van gemiddeld 1,8% tot ’n baie hoë 6,13% toegeneem. “Bo 6,25% kan jy verwag om inteelverval te kry, en ’n veeboer wil tog nie resessiewe eienskappe in sy kudde vaslê nie.”
Sósêmnr. WernerBrand, stelselbestuurder op die plase Ouplaas en Langekuil van die melkboer mnr. John Walker van Greyton in die Overberg. Werner is ook die ontwikkelaar van die nuwe Orda-sagtewareplatform, wat hy op versoek van John ontwikkel het.
Die skep van dié platform is ’n deurbraak wat inteling in kuddes drasties teenwerk, genetiese variasie en teelwaardes met rasse skrede bevorder en risiko versprei. Die beste potensiële vaars word met die vroulike diere in ’n kudde gepaar en doelwitte word optimaal bereik.
SA Stamboek onderskryf die sagtewareplatform, en ná suksesvolle onderhandelings met dié organisasie is dit kommersieel beskikbaar via die webwerf www.SADairyBulls.com.
Die belangrikste hulpbronne wat telers tot dusver gebruik het, was die nuutste BLUP- en/of GBLUP-waardes (genomiese BLUP) in die vorm van geskatte teelwaardes (EBV’s), asook genetiese verslae van telersorganisasies.
Orda span ’n volledige databasis van ’n 11 geslag-stamboom (vroulik en manlik) van alle diere in ’n kudde in.
Om die dienste van Orda en SA Stamboek via SADairyBulls.com saam te bring, werk goed, aangesien SA Stamboek (via Interbull) aan internasionale genetiese evaluasies vir melkbeeste deelneem.
SA Stamboek het ook toegang tot die volledige stambome van plaaslike kuddes wat aan die Logix-prestasietoetsskema vir melkdiere deelneem. SA Stamboek gebruik boonop die Interbull-stamboomlêer van internasionale bulle en beskik oor die omsetting van alle melkbeeste, ongeag hul land van herkoms. SA Stamboek is verder verantwoordelik vir genetiese en genomiese dienste vir plaaslike diere.
Orda maak verder ruim gebruik van die blitsvinnige aanlyn-algoritme, wat die verwantskappe van alle diere wat in parings oorweeg word, beskikbaar stel.
Deur ’n paar bulle met Orda te kies, kan die boer na verskillende scenario’s kyk deur teoreties elke bul met elke koei in sy kudde te paar. Binne sekondes kry hy verslae met resultate oor onder meer die inteling van die potensiële nageslag en ander parameters wat hy aanlyn kan besigtig. “Met die gebruik van Orda is dit baie opsigtelik wanneer ’n bul nie in jou kudde sal werk nie – al sê wie ook wat,” sê Werner.
“Sodra ’n boer Orda gebruik, kry hy ook verslae oor die teeldoelwit wat hy gekies het, ’n evaluering van paringsgehalte, ’n ontleding van genetiese meriete en variasie en ’n paringsopsomming. Elke koei en haar verwagte kalf kry ook ’n indeks.”