MNR. JULIAN SOUTHEY
HOE LAAT JULLE DIE FAMILIEONDERNEMING WERK? In 2005 het ons ’n keerpunt bereik. Ons het vyf jaar lank die diens van die konsultasie maatskappy Resource Consulting Services gebruik. As gesin het dit ons onder meer geleer om sake- en gesinskwessies te skei. Dit het ons ook geleer om die drie geheime van wins te begryp: die balans tussen oorhoofse koste, bruto winsmarge per hektaar en omsetbesteding; strategiese beplanning; en die opleiding van personeel. Ons het almal verskillende persoonlikhede en ’n visie vir die toekoms, maar het ’n gemeenskaplike visie vir die onderneming. WAT IS JUL TEELDOELWITTE? Ons lê klem op ’n mediumwol-skeersel, vrugbaarheid, ooi produktiwiteit en lammers wat vinnig groei. Die resultaat daarvan is ’n skaap met ’n gladder lyf, wat ooreenstem met die moderne Merino. OP WATTER OUDERDOM EN GEWIG WORD VERVANGINGSOOIE DIE EERSTE KEER GEDEK? Hulle word op 18 maande gedek en weeg dan sowat 42 kg. Ons laat dek die vervangingsooie afsonderlik omdat die volwasse ooie geneig is om hulle te oorheers en tydens die dekproses meer aandag van die ramme kry wanneer ons hulle saam laat dek. Vervangingsooie is vir ’n korter tyd bronstig én tree minder bronstig op. Dan slaan die ramme hulle oor. Om dieselfde rede laat ons die ouer, ervare ramme die vervangingsooie dek. Die jonger ramme dek die ouer, ervare ooie. HET JY ’N OPLEIDINGSPROGRAM VIR JOU PERSONEEL? Ons personeel word intern opgelei in basiese veeteelt, laestres-veehantering, tattoeëring, wolklassering, die dosering en merk van lammers, windpomp instandhouding en die instandhouding van heinings.