SPOEG EN POTE GEE VELD WEER SKOP
Beweiders en hul weidings het deur evolusie oor eeue heen ’n verhouding met wedersydse voordele vir mekaar ontwikkel. Met navorsing is byvoorbeeld bewys dat weidende diere se spoeg hergroei by plante stimuleer deur die beweging van koolhidrate in die plant te bewerkstellig.
Herlewingsbeweiding vorm deel van ’n groeiende beweging waarin boerderybeginsels toegepas word wat grondgesondheid en daarmee saam landbouproduksiepotensiaal laat herleef.
Dit behels praktyke in gewasverbouing en weidingbestuur wat die organiese koolstof en mikrobes se aktiwiteit in grond verhoog.
Die uiteindelike mikpunt is dat die betrokke stuk landbougrond eerder ’n netto bergplek vir kweekhuisgasse as ’n netto vrysteller van hierdie gasse word, sê die oud-Zimbabwiër prof. Richard Teague ( foto), weidingspesialis van die Texas A&M-universiteit in Amerika.
Richard, ’n voorstander van beplande drukwisselweiding vir grondherstel, sê vergelykende proewe het gewys dat die grootste bevolkings grondswamme op weidings leef wat vir kort tye swaar bewei word en dan kans kry om volledig te herstel voordat dit weer bewei word.
Die verhouding tussen swamme en bakterieë in grond word as ’n aanduider van grondgesondheid beskou. Hoe meer swamme voorkom, hoe gesonder is die grond.
Grondswamme verrig lewensnoodsaaklike funksies vir gesonde plantgroei: Dit gaan haal en maak voedingstowwe vir plantopname beskikbaar. Dit vergroot die wortelmassavolume en -diepte. Dit skei die proteïen glomalien af, wat koolstof in verskillende vorme in die grond opberg. Dit verhoog die behoud van water en voedingstowwe in die grond. Dit verhoog weerstand teen droogte. Met die hoogste swam-bakterieverhouding is plantgroei ook op sy beste.
Richard vergelyk gronddata vanaf drie nabyliggende beesplase in Texas wat oor ’n aantal jare ingesamel is. Die een is voortdurend swaar bewei, die tweede voortdurend lig bewei en op die derde is drukwisselweiding toegepas.
Verreweg die grootste hoeveelheid swamme in verhouding tot bakterieë is op die derde plaas gemeet (sien die
hieronder).