Landbou Weekblad 100
‘Ons man van Landbouweekblad . . .’
Wanneer die somervakansie voor die deur lê, maak almal reg vir die uittog see toe. Ook in Landbouweekblad is dit net vakansiepraatjies, “vistermanstories” en
kortverhale – leesstof vir dié wat ontspan en dié wat nog op die plaas woel.
21 Desember 1970 Lekker uitspan langs die viswaters – en as dit tyd is, ook sommer die galjoentjie net daar op die kole eetgereed maak. Die voorbladman is mnr. Hennie Wessels, ’n baashengelaar van Bellville.
FOTO: SIGURD OLIVIER
22 Desember 1964 As ’n mens heelnag deur geskenke afgelewer het, is jou keel darem baie droog. Daar is egter nog altyd koeie wat gemelk moet word, diere wat moet kos kry, water wat gelei moet word, en die vrugte wat gepluk en gepak moet word.
3 Desember 1963 Die visterman mnr. Jack Matthews is op Lusikisiki, Pondoland, gebore. Hy was kommandeur in die Britse vloot en is ook met die walvisvloot Suidpool toe. Vandag “boer” hy op die see, veral daar by Durban se beste bytplekke. FOTO: NEELS MEYER
17 November 1954 Sak en pak see toe! Die kunstenaar Flip, oftewel Horace Coaton, self ’n boer van die vrugteplaas Protea op Wellington, teken in die 1950’s gereeld uitbundige vakansietonele vir die voorblad.
27 Desember 1950 Die somerweer het vanjaar oral langs ons kus baie laat weggebly en baaiers moes maar heelwat koue verdra. Diegene wat meer van visvang as van swem hou, het dit heelwat gelukkiger getref.
13 Desember 1950 Een van die onaangenaamhede van die rotse: Die kraaines op die katrol net soos die vis lekker aan die byt is! Dié tyd van die jaar staan almal, ook die boer, se kop strand toe. FOTO: HAROLD M. LAMBERT