Landbou Weekblad 100
Op die voorblad
Landbouweekblad se redaksie vra keer op keer dieselfde vraag: Wat sit ons hierdie week op die voorblad? Wolboere of wetenskaplikes? Pluimvee of parasiete?
Landboustudente van Harrismith of handsaaiers van Piketberg?
24 Mei 1966 Op mev. M.C. Groenewald se werf by Pretoria wemel dit van tarentale. Sy voer hulle fyngekerfde lusern en stywepap gemaak van geelmieliemeel en kuikenmeel. Hulle hou haar lusernlande skoon van enige gogga of wurm.
28 Mei 1968 Ou inwoners beskryf die Kalahari as ’n motor se hel en ’n Afrikanerbees se hemel, waar hulle van duinegras tot kameeldoringpeule vreet. Dié sand kom in jou bloed, sê mnr. P.J. Zeeman van die plaas De Hemelstraat, Gordonia.
26 Desember 1961 Op Jeanetta Uys van Volksrust se plaas boer hulle al ’n halfeeu met South Devons, die “stiefkind van ons beeste”. Dié moddervet-ossies vaar goed op die mark. Die Uyse het van die oudste kuddes in die Transvaal.
29 Oktober 1968 Watter boer sal nie juig as eenlinge as’t ware die uitsondering op sy plaas is nie? Mnr. A.B. van der Merwe, besproeiingsboer van die plaas Mathabo, Modderrivier, selekteer vir meerlinge by sy Duitse Merino’s.
28 Augustus 1962 Anne Wright se pa, die hoenderteler mnr. T.B. Wright van Ellesmere, Grahamstad, laat sy kampioenhoenders ná tentoonstellings sonder seremonie nek omdraai sodat hulle nie siektes terugbring nie.
12 Desember 1967 BO: Koringstropers dreun kort voor Kersfees in die Rûens.
12 Januarie 1965 LINKS: Mnr. Daan Smith van De Rust kerf ’n stukkie pruimtwak vir sy pyp. Hy stop sy pyp met “ordentlike, sterk twak”.