WOLBOERE PAK DIE ‘GROOT MEET’ AAN
Die wetenskaplike meting van wol is die ingrypendste enkele metode van stroombelyning waaraan die wêreld se wolbedryf nóg onderwerp is, berig Landbouweekblad in 1975.
“As ’n maatreël vir kostebesparing vir die produsent, die handel én die nywerheid het die objektiewe meting van veseldikte en skoonopbrengs in die geskiedenis van wol geen gelyke nie.”
Een voordeel is die hantering van wol: Met die oog-enhand-metode word ’n wolbaal sowat 13 keer gehanteer van dit in die makelaar se pakhuis aankom tot dit verskeep word. Met objektiewe meting word die hantering tot vier keer verminder. Ou prosesse wat nie meer nodig is nie, is die uitstalling in die vertoonlokaal, die oopsny van bale, die uithaal van wolmonsters, die terugstop van monsters en die toewerk van oopgemaakte bale.