TIEN JAAR SE WILDPRYSE
2008 Mnr. Piet du Toit van
-
Rustenburg betaal R725 000 vir ’n Oos-Afrika-buffelbul op die wildveiling van die Stud-wildtelers naby BelaBela. Mnr. Jacques Malan van Lumarie Game Breeders betaal R1,6 miljoen vir ’n buffel met uitsonderlike groot horings. 2010 Mnr. Douw Steyn van die Shambala-wildreservaat (Vaalwater) koop ’n buffelbul teen R6 miljoen van die Kwanarereservaat, naby Stofberg, Mpumalanga. Kort daarná word die rekord verbeter toe mnre. Piet du Toit en Cyril Ramaphosa die buffelbul Bayeto van die private natuurreservaat Thaba Tholo teen R9,2 miljoen koop. 2011 ’n Oos-Afrikaanse buffelkoei behaal R4,7 miljoen op die Stud Game Breeders se veiling op Bela-Bela. In Oktober betaal ’n anonieme koper van Mookgophong R18 miljoen vir ’n buffelbul, Senatla, op die Thaba Tholo-veiling.
2012 Mnr. Piet du Toit koop die buffelbul Horison in vennootskap met mnre. Norman Adami van Beestekraal en Ben Botha van Rustenburg vir R26 miljoen by Lumari Game Breeders van mnr. Jacques Malan. ’n Week later betaal Du Toit en drie vennote nóg ’n rekord-bedrag van R12,25 miljoen vir die swartwitpensbul Charlie, ’n Wes-Zambiese bok met horings van langer as 50 duim.
2013 Rommel, ’n goue wildebeesbul met horings van meer as 29 duim, behaal R1,825 miljoen op ’n wildveiling in Limpopo. Die vorige rekord was R1,4 miljoen.
2014 Die sakeman dr. Johann Rupert betaal R40 miljoen vir die buffelbul Mystery
(nou Oubaas) op Thaba Tholo se jaarlikse veiling. ’n Wit saalrug-blesbokram behaal R7,8 miljoen op die Kirkwood-veiling.
2015 Hercules, ’n koedoebul van mnr. Dries Visser word teen R9,4 miljoen aan ’n konsortium verkoop. Mnr. Barend Vorster van Letsitele betaal R27 miljoen vir Mopanie, ’n Zambiese swartwitpensbul, op mnr. Piet Warren se veiling. 2016 Op sy wildveiling in Februarie verkoop mnr. Piet du Toit en sy twee vennote ’n 25%-aandeel in die buffelbul Horison teen R44 miljoen aan ’n teler van Mookgophong. ’n Konsortium wildboere betaal R168 miljoen vir die buffelbul Inala op die jaarlikse Thaba Tholo-wildveiling naby Thabazimbi.
2017 Mnr. Jacques Malan koop ’n springbokram teen R1,55 miljoen op die jaarlikse veiling van me. Tina de Jager van Valley Venture in Vryburg. 2018 Die hoogste prys op die jaarlikse Kirkwood-veiling is R135 000 vir ’n buffelbul van die Kamdeboo Nasionale Park. Gina, ’n Zambiese swartwitpenskoei wat dragtig is by Busanga, ’n Zambiese bul met horings van oor die 50 duim, behaal R210 000 op die Vyfster-wildveiling van mnr. Dries Visser by Bela-Bela.