MEER MIELIES OP MINDER HEKTAAR

Suid-Afrikaanse boere se kundigheid en tegnologie om mielies te verbou en ’n stapelvoedsel vir mens en dier in Suid-Afrika en die streek te voorsien, het die afgelope eeu ’n omwenteling ondergaan. Die opbrengs het vermeerder en hektare verminder. 1923-’24. 765 000 ton mielies word op 1,56 miljoen ha aangeplant teen ’n gemiddelde opbrengs van 0,483 t/ha.

1952-’53. Die gemiddelde opbrengs per hektaar is die eerste keer hoër as ’n ton, naamlik 3,17 miljoen ton mielies op 3,13 miljoen ha teen 1,012 t/ha.

1967-’68. Die grootste hoeveelheid hektare kommersiële mielies wat tot nog toe aangeplant is: 4,73 miljoen ha. Tog is die totale produksie net 5,17 miljoen ton teen 1,12 t/ha. 1973-’74. Nasionale dubbelsyferproduksie word die eerste keer in die geskiedenis behaal: 10,6 miljoen ton op 4,46 miljoen ha. Die gemiddelde opbrengs is 2,37 t/ha. 2016-’17. Die grootste mielie-oes nóg (16,7 miljoen ton) word op 2,63 miljoen ha verbou teen 6,37 t/ha.

Die afgelope jare het die planttyd in die westelike somersaaigebied ál later begin verskuif. Daarmee saam het dit noodsaaklik geword om so vinnig moontlik te plant.

Op 15 Januarie 2016 het dit uiteindelik oor die westelike deel begin reën.

Volgens Graan SA is daar toe 700 000 ha in tien dae aangeplant – teen 1,26 miljoen mieliepitte per minuut.