99 JAAR IN DIE BLOMMEKERK
Sedert 1920 het Clanwilliam se kerk ’n besonder hegte band met sy blomryke omgewing, skryf Estelle du Toit in 1976.
“Met die instap in die bruidskoekkerkie (spierwit met bogies en torinkies) voel dit of jou asem skoon wegslaan. Die swaar, soet geur van heuning hang in die lug. Plasse kleur lê uitgestort op die plankvloer. Die gezoem binnekant is nie dié van bye nie. Daar is ’n skaar vroumense bymekaar, van alle groottes, ouderdomme en kleure. Die monde babbel, maar die vingers werk nog vinniger.
“Tussen alles deur vleg Kay Berg, die voorsitter van die veldblommevereniging, soos ’n nat steen seep. ‘Stop nog ’n bietjie toe daarlangs!’, ‘hierdie geles moet uit hier!’, ’nou by jou, hoor!’
“Van ver af ry die mense hul streek se blomsoorte aan. Daar’s blomme uit die Sandveld, die Strandveld, die Hardeveld, die Karoo, en van Biedouw af bring hulle ook proteas by die armsvol, sederhout uit die Sederberge, aronskelke van die vleie af, katstert, slangbos om oop kolle mee toe te stop, kliphout vir ’n mooi agtergrond, tolbos, geel kol-kol . . . Só dra die helpers aan. Blink baddens en groen petrolkonkas met blomme in water staan die wêreld vol.”
Dit het al tradisie geword dat Clanwilliam se blomme vir ’n goeie saak werk. Die eerste skou is in 1920 deur dr. Le Fras Nortier geopen om geld vir die plaaslike skool in te samel. In 2019, die skou 99ste jaargang, skenk die veldblommevereniging steeds aan liefdadigheid en samel geld in om historiese geboue in stand te hou.