SA ‘NADER DIE DRAAIPUNT’
DIE ekonomie gaan vanjaar nog sy draaipunt beleef en ’n opflikkering in ekonomiese groei is volgende jaar in die vooruitsig, sê mnr. Ettienne le Roux, hoofekonoom by Rand Aksepbank. Hy verwag die ekonomie gaan stadig – met net sowat 2% – oor die volgende twee jaar groei. Inflasie sal volgens hom gemiddeld 6% wees.
Le Roux sê die groei sal deur internasionale sowel as plaaslike faktore gedryf word.
“Die internasionale toestande sal nie swakker word nie en kommoditeitspryse in dollar behoort nie verder te val nie.”
Volgens hom kry die dollar ’n hupstoot in Amerika waar rentekoerse begin styg, maar daar is terselfdertyd ’n beperking, want hoe sterker die geldeenheid
Landbouweekblad raak, hoe taaier raak finansiële toestande en kommoditeitspryse onder druk.
“Dit is hoekom ek meen die rentekoers in Amerika sal nie so erg styg soos talle mense dink nie. Daarom sal die dollar ook nie veel sterker raak nie. Dit het ’n invloed op die wisselkoers.”
Hy verwag dat die rand tot 2018 tussen R14 en R17 teenoor die dollar gaan verhandel.
Plaaslike faktore wat in die Suid-Afrikaanse ekonomie se guns tel, is dat die elektrisiteitsprobleme nie meer so erg is soos vantevore nie en minder van ’n demper plaas op ekonomiese groei.
“Wat die droogte betref, sal dinge hopelik ook nie erger raak vir die landbou nie,” het Le Roux op Agbiz se kongres op Somerset-Wes gesê.
Hy sê verbruikers hoef nie meer slapelose nagte te hê oor die stygende rentekoers nie. Die repokoers sal waarskynlik ’n hoogtepunt van 7,25% bereik.
“Dié syfer is naby en histories is dit al gewys rentekoerse begin sowat 12 tot 18 maande ná die hoogtepunt daal. Dit sal die ekonomie ’n verdere hupstoot gee.”
VERSIGTIGER
Die ekonomie het die afgelope maande gebuk gegaan onder ’n val in kommoditeitspryse, die verswakking van die rand en rentekoersverhogings. Volgens Le Roux was daar die afgelope tyd ’n skuif van ’n verbruikerskultuur na ’n konserwatiewer benadering.
“Onthou, verbruik maak 60% van ons ekonomie uit en in dié swak ekonomiese toestande het besteding ’n knou gekry.” Mnr. Ettienne le Roux Hy sê dele van die vervaardigingsbedryf, landbou-uitvoerbedrywe, soos vrugte, neute en sitrus, en toerisme “toon nog tekens van lewe”.
Die swak rand het ook geleenthede gebring om plaaslike produkte vir ingevoerde produkte te vervang. –
Histories is dit al gewys rentekoerse begin sowat 12 tot 18 maande ná die hoogtepunt daal.