ANC vat Land Bank weg van Tesourie
DIE mandaat van die Land Bank sal hersien word en hy sal weer teruggaan na die Departement van Landbou, Bosbou en Visserye, het die nasionale uitvoerende komitee (NUK) van die ANC besluit.
Die Land Bank is in 2008 uit die ou Departement van Landbou en Grondsake na die Tesourie geskuif weens ongerymdhede in die bestuur.
Mnr. Gwede Mantashe, sekretaris-generaal van die ANC, het op ’n perskonferensie ná ’n vergadering van die NUK die skuif verduidelik.
“Boere op kommunale grond het nie toegang tot geld van die Land Bank nie, want hulle het nie titelaktes nie. Maar op daardie kommunale grond kan kos geproduseer word wat tot voedselsekerheid bydra. ’n Ontwikkelingsinstelling (soos die Land Bank) moet hierdie werklikheid meer as ’n kommersiële bank verstaan. Een manier hoe dit kan gedoen word, is wanneer hy met daardie sektor (die landbou) werk,” het Mantashe gesê.
Die NUK meen dis van uiterste belang dat herverdeelde grond produktief is. Ondersteuningsmaatreëls, soos die toegang tot geld en markte, gehalte en doeltreffende voorligtingsdienste en infrastruktuur, was onder meer beklemtoon om produksie te verbeter.
“Daar sal ’n spesiale klem wees op landelike gebiede, dorpe en alle ander gebiede waar dienste tekortskiet.”
KOMMERSIEEL
Dr. John Purchase, uitvoerende hoof van Agbiz wat tot onlangs in die Land Bank se direksie gedien het, meen die skuif is ’n fout.
“Ek is bang dit is ’n politieke oorweging en dat dit nie vanuit ’n good governance-oorweging gedoen word nie.”
Hy sê die Land Bank is juis van die Departement van Landbou, Bosbou en Visserye se vlerk verskuif omdat daar groot bestuursprobleme in 2007 en 2008 ontstaan het.
“Dit het harde werk gekos om die bank se integriteit te herstel. Ek twyfel sterk of daar vermoë binne die Departement van Landbou, Bosbou en Visserye is om ’n toesighoudende funksie oor die Land Bank en sy werksaamhede te vervul. Ek weet daardie vermoë bestaan wel by die Tesourie.”
Mnr. Omri Van Zyl, uitvoerende direkteur van Agri SA, het gesê dit is belangrik dat die bank wat ’n instelling vir ontwikkelingsfinansiering is, sy mandaat en dienste aan kommersiële kliënte behou.
Die bank het tot onlangs uitstekend gevaar met die omdraaistrategie, ongekwalifiseerde oudits, ’n groeiende kliëntebasis die afgelope drie jaar en ’n jaar tot jaar bategroei van ongeveer 14%.
Dit is van die uiterste belang dat die bank onder die wetgewing funksioneer wat dit in werking gestel het en dat die oudit en “skoon” verslagdoening behou word. “Enige moontlikheid van bedrog en korrupsie moet afgeweer word.”
Van Zyl het gesê dat Agri SA bekommerd is oor wat die uitwerking daarvan op die leningsvoorwaardes met die finansiers is. “Die Land Bank het ongeveer 30% van die landbouboek in Suid-Afrika. As die voorwaardes verbreek word, sal die instansie nie institusionele steun kry om die bedryf voortaan te ondersteun nie.”
Hy het ook gesê dat kontantvloei en die groei van die bank belangrik is. ’n Situasie dat die bank weer ’n probleem met toegang tot kapitaal sal hê, sal baie skade doen. –
As Brittanje in die referendum op Donderdag 23 Junie besluit om die Europese Unie (EU) te verlaat, sal Suid-Afrika van voor af met dié belangrike handelsvennoot vir marktoegang en samewerkingsooreenkomste moet onderhandel.
Mnr. Peter Draper, besturende direkteur van die onderneming TUTWA Consulting, het op Agbiz se kongres op Somerset-Wes gesê hy twyfel of Brittanje die EU die rug sal keer.
“Indien dit wel gebeur, sal Brittanje nie langer aan die EU se handelsooreenkomste hoef te voldoen nie. Dit beteken die handelsooreenkomste met Suid-Afrika sal beëindig word. Daar sal geen samewerkingsooreenkomste wees nie en ons sal weer moet onderhandel. Dit kan veral moeilik wees as Brittanje groter toegang vir sy produkte tot Suid-Afrikaanse markte wil hê.”
In die ergste geval kan Brittanje besluit om nie weer sy mark vir Suid-Afrikaanse produkte oop te maak nie.
Draper meen egter dit gaan meer probleme vir Brittanje as vir Suid-Afrika beteken, want hy sal ook van nuuts af met ander lande moet onderhandel.
“Selfs pres. Barack Obama het Brittanje onlangs laat verstaan dat Amerika bereid sal wees om te onderhandel, maar Brittanje sal in ’n lang tou moet inval om dit te doen.” –
Old Mutual hoop om munt te slaan uit landbougrond in Afrika deur ’n verhoogde aandeel in die landbou-beleggingsmaatskappy UFF African Agri Investments.
Old Mutual het aangekondig hy het sy aandeelhouding in UFF van 28% tot 49% verhoog. Me. Diane Radley, uitvoerende hoof van Old Mutual Investment Group, sê die landbou as bateklas het internasionaal reeds groot momentum gekry, maar in Afrika is dit nog in sy kinderskoene.
UFF African Agri Investments is reeds geruime tyd 'n raadgewer vir Old Mutual Investment Group se fondse Futuregrowth Agri en Old Mutual Agri.
Die plase waarin die maatskappye belê, moet aan omgewings-, maatskaplike en bestuurstandaarde voldoen. –
Landbouweekblad