Markte handel reeds asof S&P SA as rommel beskou

BY verlede week se Agbiz-kongres was die vraag op almal se lippe of Suid-Afrika die kredietgraderingsagentskap Standard & Poor’s Vrydag sou kon oortuig om nie die land se kredietgradering afwaarts aan te pas nie.

Die agentskap Moody’s het vir ’n groot verrassing gesorg toe hy in Mei besluit het om Suid-Afrika se kredietgradering onveranderd te laat op Baa2/P-2. Dit het gevolg nadat Moody’s Suid-Afrika se ekonomiese verwagtinge in Desember van stabiel na negatief verander het en in Maart na negatief met die bedoeling om dit af te gradeer.

Standard & Poor’s en Fitch het Suid-Afrika albei vroeër een stap bo rommelstatus gegradeer.

Mnr. Ettienne le Roux, hoofekonoom by Rand Aksepbank, het op Agbiz se kongres op Somerset-Wes gesê almal wonder sedert Maart waarom Standard & Poor’s Suid-Afrika nie afgegradeer het nie.

DRAAIPUNT

Hy sê sekere aspekte van die Suid-Afrikaanse ekonomie het “net genoeg twyfel” by Moody’s geskep om “nie die sneller te trek nie”, en meen Moody’s was beslis beïndruk met mnr. Pravin Gor- dhan, Minister van Finansies, se begroting in Februarie – veral die inisiatiewe wat groei aanspoor. Dit sluit dié inisiatiewe in: Die Regering se plan om die onafhanklike kragverskaffer-model vir hernieubare energie uit te brei; Die Kommissie vir Bemiddeling, Versoening en Arbitrasie (KBVA) sal ’n meer aktiewe rol speel om arbeidsdispute op te los; Invest SA (’n alles-in-een-diens vir potensiële beleggers) is intussen op die been gebring; Staatsbeheerde ondernemings moet doeltreffender raak en koste aansienlik besnoei; Die maatreëls om visum-regulasies te verslap het ook reeds in werking getree; ’n Aangepaste migrasiebeleid sal help om die vaardigheidstekort aan te roer; Gordhan het ook aangedui die openbare tenderproses sal gemoderniseer word om korrupsie uit te roei en geld te bespaar.

SLEGTE NUUS

Volgens Le Roux sou dit nie ’n groot skok gewees het as Standard & Poor’s Vrydag slegte nuus gebring het nie.

“Suid-Afrika dryf reeds handel asof ons êrens tussen BB en BB+ lê, maar hoewel die finansiële markte dalk klaar die slegte nuus verdiskonteer het, sal die régte ekonomie dit steeds voel.

“Die koste van finansiering sal vir almal styg – van staatsliggame tot banke en verbruikers. Met verloop van tyd kan dit net nadelig wees.”

–