SPLINTERNUWE TEGNOLOGIE ‘KYK’ BINNE VRUGTE
Danksy splinternuwe tegnologie kan ’n groot appel-en-peerpakskuur nou binne-in hul vrugte “kyk” om die suikervlakke te toets of om interne probleme, soos verbruining, op te spoor.
Die Two-A-Day-groep in Grabouw het onlangs ’n Greefa-sorteerder met tien bane uit Nederland geïnstalleer. Dit is die grootste in sy soort in die Suidelike Halfrond en kan tot agt vrugte per sekonde hanteer.
Saam met nuwe iFA-ligtegnologie wat tot binne die hart van elke appel of peer kan “sien”, kan die maatskappy nou appels en pere se Brix-inhoud nagaan en vir interne probleme soek. Tot dusver was dit nie moontlik sonder om die vrugte oop te sny nie. Die Greefa-kameras kan ook stingelverbruining bereken, sonbrand op appels meet en die verskil tussen haelskade en ander merke raaksien. Dit wys ook kneusing en papper vrugte uit.
Die nuwe tegnologie skyn ’n hoë-intensiteit-lig deur die vrugte en sagteware meet dan die verskil in die ligintensiteit om enige probleme te bepaal. Dit is basies ’n vrugte-vriendelike manier om ’n X-straal van elke vrug te neem sonder om dit te beskadig.
Kamera-skandeertoerusting het produktiwiteit by die pakskuur al met 25% laat styg. Dit was egter tyd om die digitale GigEkamera wat hoëdefinisiebeelde geneem het om kleurseleksie te verbeter, op te knap, sê mnr. Conrad Fick, Tru-Cape se bemarkingsbestuurder. INLAS: BO: Tru-Cape versprei Two-A-Day se vrugte. Conrad sê verbruikers het deesdae baie spesifieke verwagtinge oor die vrugte wat hulle koop.
“Tru-Cape se pakskure het nou die vermoë om met algoritmes vrugte met ’n beter kleur en sonder merke uit te soek. Met dié belegging sal ons miljoene rande bespaar, want ons produktiwiteit sal toeneem en minder vrugte sal verwerp word omdat dit nie aan verpakkingspesifikasies voldoen nie of tekens van interne skade wys.”
Hulle wou nie bekend maak wat die tegnologie gekos het nie.