MET IT-KOMPETISIE
Jong boere en studente uit Afrika en Europa het vanjaar weer die kans om R270 000 te wen vir hul idees om vernuwende satelliettegnologie in die landbou te gebruik.
Die Europese agentskap Global Navigation Satellite System (GNSS) en sy omgewingsagentskap bied dié kompetisie aan, en die masjinerie-vervaardiger Claas en die landboumaatskappy Bayer borg dit.
Die Farming by Satellite-kompetisie het ten doel om satelliettegnologie in vernuwende landbou-praktyke aan te moedig en die impak van die landbou op die omgewing te verminder.
Deelnemers hoef nie self te boer nie, maar die plan waarmee hulle vorendag kom, moet op die landbou, voedselproduksie en die benutting van grond van toepassing wees.
Daar is vanjaar ook ’n spesiale prys vir enige voorlegging wat in die behoeftes van boere in Afrika voorsien, en die wenner in hierdie afdeling kan met prysgeld van R105 000 wegstap.
Enige individu of span van ’n universiteit of kommersiële organisasie kan hul nuwe planne en tegnologiese oplossings inhandig, of gevallestudies van proewe, veral dié wat die Europese Geostationary Navigation Overlay Service (EGNOS), die Galileo-stelsel of die Copernicus-diens gebruik.
Die vorige wenner, mnr. Daniel Hege van Duitsland, het ’n goedkoop outomatiese GPS-stuurstelsel ontwerp, waarmee groenteaanplantings se ry-spoed versnel word, en wat verseker dat ’n stuk grond in sy geheel beplant word.
Vorige finaliste het ontwerpe, soos aanlyn-dataplatforms met geo-verwysings, swerm-tegnologie, robotte wat saad met presisie plant, tegnologie om olywe selektief te oes en die gebruik van hommeltuie in vroeë waarskuwingstelsels oor hongersnood, ingeskryf.
Enige student of boer jonger as 32 kan deelneem. Die sluitingsdatum vir registrasie is 30 Oktober. — FREDALETTE UYS
www.farmingbysatellite.eu.