Karoo-knoffel: Van neus optrek tot pure lekkerkry
Charlotte Botes van die plaas Oskopvlakte naby Laingsburg verbou knoffel waarmee sy heerlike, gesonde produkte maak. Sy noem haar onderneming Koup Knoffel.
Hoe het jy by Koup Knoffel betrokke geraak? Ek het die onderneming gekoop nadat Jacolise Botes, wat oorspronklik die produkte ontwikkel het, oorlede is. Ek het besef knoffelprodukte kan ons boerdery finansieel help en het die resepte mettertyd verfyn.
Hoekom is knoffel ’n geskikte boerderygewas in die Karoo? Water is skaars in die Karoo en knoffel het min water nodig. Ons gebruik sonkrag om water van so diep as 120 m na bo te bring. Ek doen die verwerking en verpakking in my huis.
Wat maak jy alles met knoffel? Ons maak ’n unieke gepiekelde produk wat ons aan deli’s, padstalle en plaaslike winkels, soos OK, Karoo Biltong en Granaat, lewer. Ons verkoop ook op feeste en markte. Dit kan net so in slaaie, groente, omelette of op pizza gebruik word en is heerlik in ’n slaaisous. Die reeks bestaan tans uit ses geure (onder meer suurlemoen, rissie en kruie). My mosterd, blatjang, marinade en songedroogde knoffelvlokkies is baie gewild.
Was finansiering moeilik? Ja, want ek benodig tien maande om my produk te lewer. Dis boonop arbeidsintensief om knoffel te oes, skoon te maak, te piekel en in klein botteltjies te verpak. Lone het ook ’n groot invloed. Finansiële instellings stel nie juis daarin belang om nuwe maatskappye met onbekende produkte en boonop sonder enige waarborge te help nie. Ek het baie voor dooiemansdeur gekom – selfs by die bank waar ons al jare kliënte is. Tans gebruik ons elke sent wat inkom om voorraad te koop en vir meer feeste en groter markte voor te berei.
Hoe bly jy dan gemotiveer? Ek bied ’n unieke, smaaklike, tuisgemaakte en gesonde produk wat nie alledaags op winkelrakke beskikbaar is nie. Daar is niks so bevredigend as om te sien hoe mense wat sê hulle eet nie knoffel nie, weer en weer kom proe en koop. Waar hulle voorheen hul neuse opgetrek het, geniet hulle dit nou. Ek plaas nie net ’n gesonde produk op die rak nie; ek weet ek voorsien my werkers van ’n manier om hulself en hul gesinne beter te versorg. Dan is ek trots op my harde werk en voel asof ek in my doel slaag.
Hoeveel mense werk vir jou? Drie permanente plaaswerkers help om die knoffel skoon te maak. Ek het hulle self opgelei. Ons gebruik ook ses deeltydse werkers uit die plaaslike gemeenskap om te help plant, oes en ontblaar. Dis belangrik dat al die betrokkenes die proses, probleme, mislukkings en sukses verstaan. Deur stukwerk kry elkeen ’n kans om meer geld te verdien. Die produkte word ook vinniger verwerk.
Wat wil jy nog bereik? Ek ontwikkel nog drie produkte om by die bestaande reeks te voeg. My droom is om ’n padstal en eetplek op ons plaas oop te maak. Ek wil ook ’n fabriek bou waar al my knoffelprodukte verwerk word, sodat ek produksie uit my huis kan skuif.
072 544 9362 023 551 1489, info@garlic. co.za, www.garlic.co.za.