DROOGTEHULP ‘ONREGVERDIG VERDEEL’

Ek boer in Namakwaland in die Wes-Kaap. Ons naaste kantoor van die departement van landbou is op Vredendal.

Ons het op 31 Mei die eerste keer gehoor van droogtehulp in ons omgewing. By navraag het ’n werknemer van die departement op Vredendal ons in kennis gestel dat alle georganiseerde landbou-organisasies van die hulp weet. My swaer boer naby Kliprand en hulle het ook grond in die Wes-Kaap, maar hulle was nie bewus van die droogtehulp nie, hoewel hulle vriende met die voorsitter van hul boerevereniging is.

Ons is van die kleiner boere in die omgewing en het finansieel regtig die hulp nodig omdat ons nie meer veld vir ons diere het nie. Ons is egter duidelik laat verstaan dat die geld al byna uitgeput is, maar ons moet maar probeer aansoek doen. Nou hoor ons van die groot boere met groot plase en baie skape het al lankal droogtehulp gekry. Dit lyk vir my na ’n geval van “dis wie jy ken”, of sekere mense wil nie die son op hul medeboere sien skyn nie. Dis soos die Bybel sê: Dié wat het, sal kry.

Terwyl ons ons teleurstelling moet probeer verwerk en hoop dat ons ook finansieel gehelp sal word, kan die betrokke amptenaar by die departement sekerlik vriendeliker en hulpvaardiger wees. Ek dink daar behoort beter beheer oor droogtehulp te wees sodat álle boere hulp kan kry. NICO BOONZAAIER Landbou.com