PLAASGEWELD KAN LAND LAAT MISLUK
VOORTSLEPENDE aanvalle in plaasgemeenskappe veroorsaak ernstige skade en onsekerheid wat ’n invloed op werksgeleenthede, ekonomiese groei en voedselsekerheid kan hê, sê mnr. Senzeni Zokwana, Minister van Landbou, Bosbou en Visserye. “Ek gee u die versekering dat ek ernstig bekommerd is oor hierdie aanvalle omdat dit die stabiliteit van die sektor bedreig.”
’n Werksessie oor plaasaanvalle is in Pretoria deur sy departement en verskeie belanghebbendes, soos die polisie, die georganiseerde landbou, arbeidsverteenwoordigers, vakbonde en die Menseregtekommissie, gehou.
“Ons moet ophou om vingers na mekaar te wys oor wat die grondoorsake is en verenig om enige vorm van geweld teen plaaseienaars en plaaswerkers stop te sit,” sê Zokwana.
Volgens hom gaan slaap meer as 12 miljoen mense in die land elke aand honger. As daar weens plaasaanvalle nie stabiliteit in die landbousektor is nie, kan die land misluk.
MINDER MOORDE
Genl.maj. Leon Rabie, nasionale hoof van strategiese bestuur by die polisie, het gesê daar is 879 polisiekantore in landelike gebiede en by 776 van hulle is die landelike veiligheidstrategie al in werking gestel, al werk dit nie oral goed nie. By 60 is dit gedeeltelik in werking gestel en by 43 is nog niks gedoen nie.
Volgens die polisie se statistiek neem plaasaanvalle en -moorde af. Rabie sê in die 2014-’15-boekjaar was daar 490 aanvalle en 60 moorde en in die afgelope boekjaar 446 aanvalle en 49 moorde. Hy het na meer as 20 sake verwys waar skuldiges aan plaasmoorde vonnis van 20 jaar tot lewenslank opgelê is.
Met verwysing hierna het die vakbondleier mnr. Nosey Pieterse gesê dit is net swart mense wat “goeie tronkmateriaal” is. Hy wou weet of daar al ’n boer was wat ’n vonnis van 25 jaar vir ’n moord op ’n werker gekry het.
RESERVISTE
Lt.genl. Kgomotso Phahlane, waarnemende polisiekommissaris, het na sy vorige ontmoetings met AfriForum en Agri SA verwys en dit beskryf as bemoedigende verbintenisse wat die polisie sal help in die stryd teen landelike misdaad.
“Al is daar ’n afname in moorde te bespeur, is elke verlies aan ’n lewe een te veel.”
Agri SA het die polisie op ’n vergadering verlede week gevra daar moet dringend gekyk word na die behoorlike vestiging van die reservistestelsel in ál die provinsies om die polisie se hand te sterk en gevra of die vereistes in landelike gebiede nie te streng is nie.
“Alles wat bespreek is, sluit aan by ons nuwe benadering om die basiese dinge regte doen, soos meer sigbare polisiëring, deeglike misdaadondersoeke en beter insameling van misdaadinligting,” volgens Phahlane.
Hy sê die Regering se aankondiging dat misdaadstatistiek kwartaalliks beskikbaar gestel gaan word, sal help om misdaadneigings vinniger te identifiseer en daarteen op te tree.
Hoewel die Departement van Justisie nie statistiek oor skuldigbevindings rakende plaasaanvalle het nie, dui algemene statistieke van die vorige boekjaar daarop dat daar in alle howe saam 289 245 suksesvolle vervolgings was. Dit is ’n skuldigbevindingskoers van 93%.
Die hoër howe het ’n koers van 89,9% gehandhaaf met 910 skuldigbevindings en die streekhowe ’n koers van 78,4% (die hoogste in ’n dekade) met 24 958 skuldigbevindings.
–