Só vorder planne vir goedkoper oesversekering
DIE droogte het nuwe momentum gebring aan pogings om oplossings vir duur multirisiko-oesversekering te vind.
Mnr. Dawie Buys, tegniese raadgewer van die Suid-Afrikaanse Vereniging van Versekeraars (SAIA), sê goeie vordering is die afgelope jaar en veral die afgelope tyd gemaak in gesprekke tussen die bedryf, die Land Bank, die nasionale Tesourie en die Departement van Landbou, Bosbou en Visserye.
’n Vennootskap tussen die openbare en private sektor word in die vooruitsig gestel en verskillende modelle word ondersoek waardeur die Regering betrokke kan raak by ’n produk vir veelvuldige oesversekering. “Dit is duidelik die Regering is ernstig oor die kwessie.”
Sowat drie jaar gelede het die twee staatsdepartemente ’n konsultant opdrag gegee om ’n verslag met voorstelle op te stel. Die SAIA was een van die partye wat in November 2014 kommentaar gelewer het. Daarna het die SAIA nie weer iets gehoor nie.
WÊRELDBANK
Buys sê die proses het sedert verlede jaar weer momentum gekry en hy is veral optimisties ná die Regering vroeër vanjaar die Wêreldbank betrek het om ’n ondersoek oor moontlike oplossings te doen.
Herversekeraars is ook betrokke, onder meer groot internasionale ondernemings, soos Munich Re, wat hom laat in 2013 aan die Suid-Afrikaanse oesversekeringsmark onttrek het.
Kundiges van dié ondernemings lewer tans insette.
Buys sê selfs al sou die Regering oesversekering subsidieer, is herversekeraars se betrokkenheid steeds nodig en sal meer sulke ondernemings hopelik betrokke raak wanneer die Regering dit subsidieer.
Die doel is om ’n produk te ontwikkel wat oesversekering bekostigbaar en lewensvatbaar sal maak. Meer as net die handjie vol boere wat dit tans kan bekostig, moet oesversekering kan uitneem. Dit is vir die Regering veral belangrik dat opkomende boere dit ook moet kan bekostig, sê Buys.
Suid-Afrika is die enigste land in die Brics-groep wat nie oesversekering aan boere subsidieer nie.
EISE
Intussen verwag die bedryf dat diegene wat dit wel nog kan bekostig, vanjaar weens die droogte meer eise gaan indien. “Dit is ’n groot bekommernis vir die bedryf dat ’n groot toename in eise tot verdere verhogings in premies kan lei, wat oesversekering nóg duurder kan laat word,” sê Buys.
Die SAIA is intussen besig om sy landboukomitee, wat hoofsaaklik aan die kwessie van duur oesversekering aandag gegee het, te vervang met ’n breër forum. Dié forum sal steeds voorrang gee aan oesversekering, maar sal ook na landbouverwante versekering in die algemeen kyk. –