PLAASVERKOPE | Kry die régte storie
’n Unieke platform op Landbou.com sal talle brandende vrae oor grondverkope in Suid-Afrika kan beantwoord. Dié platform bevat plaasverkope wat die afgelope 12 maande by die Aktekantoor geregistreer is en wat in die tydskrif en op die webwerf gepubliseer word. Die ontleding van data van die plaasverkope is vir 12 maande per distrik saamgevat en verskyn in nuttige tabelle (kyk op bl. 87 vir die Vrystaatse data). Die tabelle sal sover moontlik weekliks en per provinsie in gepubliseer word.
Die tabel bevat die aantal transaksies per distrik per maand (oor die 12 maande), die totale hektare verkoop, die laagste prys per hektaar, die hoogste prys per hektaar, die gemiddelde prys per hektaar en die distrik se prysneigings.
Mnr. Johann Bornman, voorsitter van Agri Development Solutions, het die platform saamgestel, en hy lewer weekliks kommentaar op neigings in die provinsies. Kontak hom by e-pos: jchb@mweb.co.za.
Op die webwerf: Ál die inligting is van meet af aan op Landbou. com beskikbaar, plus meer besonderhede oor die transaksies, soos plaasgroottes, hoeveel hektaar per maand in ’n distrik verkoop is en die bedrae wat betaal is. Lesers kan ook sien wie die grondaankope gedoen het, soos transaksies deur die staat en transaksies met mense van kleur. Besoek Landbou.com en klik op Plaasverkope. Die syfers op die webwerf én in die tydskrif sal so gereeld moontlik bygewerk word.
—